Շուշան Օհանյան
ԱՄՆ Միջազգային զարգացման գործակալության ֆինանսավորմամբ իրականացվող «Մաքուր էներգիա և ջուր» ծրագրի շրջանակներում հուլիսի 11-ին Գորիսի Օրհուս տեղեկատվական կենտրոնում տեղի ունեցավ խորհրդակցություն: Խորհրդակցության նպատակն էր ներկայացնել Որոտանի գետավազանային կառավարման պլանի մշակման գործընթացում գետավազանի ջրային ռեսուրսների վրա բնական և մարդածին ճնշում-ազդեցությունները, ինչպես նաև լսել շահագրգիռ կողմերի կարծիքներն ու առաջարկությունները խնդրի վերաբերյալ:
Սկզբում ծրագրի մասնագետ Լիլիթ Հարութունյանը ներկայացրեց գետավազանային կառավարման պլանավորման գործընթացը՝ խոսելով պլանավորման հիմքերի, փուլերի մասին: Արտյոմ Մխիթարյանը, շարունակելով ներկայացնել ծրագիրը, ասաց. «Մաքուր էներգիա և ջուր» ծրագիրը մեզ օգնեց երկու մեծ հարցում. առաջինը՝ Արարատյան հարթավայրի ստորեկրյա ջրային ռեսուրսների գնահատումն է, երկրոդը՝ 2011թ կառավարությունը արձանագրային որոշմամբ հավանություն է տվել մեր կողմից ստեղծված ջրավազանային կառավարման մոդելային պլանի բովանդակությանը, և ասեմ, որ բոլոր կառավարման պլանները պետք է մշակվեն այդ բոցվանդակության գլուխներին համապատասխան»:
Այնուհետև ԵՏՀ փորձագետ Արամ Գևորգյանը ներկայացրեց գետավազանային կառավարմման պլանների մշակման սկզբունքները: Արամը խոսեց ԵՄ Ջրի Շրջանակային Դիրեկտիվի պահանջներին համահունչ գետավազանային կառավարման պլանավորման գործընթացի, ՀՀ օրենսդրությանը համահունչ գետավազանային կառավարման պլանի մշակման հիմնական փուլերի, գետավազանային մարդածին գործունեության ճնշում-ազդեցությունների վերլուծության մասին:
Որոտանի գետավազանային բնութագրման և ջրօգտագործման մասին խոսելիս` հիդրոլոգ Բենյամին Զաքարյանը ներկայացրեց գետավազանի սոցիալ-տնտեսական վիճակը: Ըստ այդ տվյալների գետավազանում բնակվում է 79 706 մարդ, որոնց 49.7%-ը տղամարդիկ են, 51.3%-ը՝ կանայք, բնակչության միջին խտությունը կազմում է 32 մարդ/քառ.կմ, բնական աճը տարեկան 0.21% է, որը ցածր է ՀՀ միջինից, կյանքի միջին տևողությունը մոտ է հանրապետության ցուցանիշին՝ 74.3 տարի և այլն: Թեմայի մասին իր դիտարկումները ներկայացրեց նաև «Մաքուր էներգիա և ջուր» ծրագրի կլիմայի փոփոխության մասնագետ Նաիրա Ասլանյանը:
