Անազատության մեջ գտնվող Կարեն Ճաղարյանի կինը՝ Նունե Մինասյանն ասում է, որ եթե ամուսնու ձերբակալության մասին լուրն ավելի վաղ ստանար և ֆինանսական միջոցներ ունենար փաստաբան գտնելու, ամուսինն այժմ ազատության մեջ կլիներ, նրա նկատմամբ այլ վճիռ կկայացվեր: Իսկ պետության կողմից տրամադրված հանրային պաշտպանը, Նունեի խոսքով, օգնել է իր ուժերի ներածին չափ, որը, մեղմ ասած, նրան չի գոհացրել. «էտ նաև իմ կարծիքը չի, շատ մարդիկ են ասել՝ հանրային պաշտպանը պետության մարդն է, ի վիճակի ես՝ փաստաբան վարձի, բայց հնարավորություն չեմ ունեցել»,-ասում է Նունեն:
«Երբ ձերբակալման լուրն իմացա, Կարենն արդեն պետության կողմից նշանակված հանրային պաշտպան ուներ: Ուզում էի, փաստաբան վարձել, բայց ասացին՝ մեկ ա, ոչ մի բան չի փոխվի»,-պատմում է զրուցակիցս: Հետո անկեղծանում, որ փաստաբան վարձելու հնարավորություն էլ չուներ, իսկ նրանց կողմից մատուցված ծառայությունը մեծ գումարներ է պահանջում, որն իրենց պես «պակաս» ապրող մարդիկ, չեն կարող վճարել:
Սյունիքի մարզի ընդհանուր իրավասության առաջին ատյանի դատարանը 2017 թվականի դեկտեմբերի 14-ին, Կարեն Ճաղարյանին առաջադրված մեղադրանքով՝ այն է՝ մարիխուանա տեսակի թմրամիջոց ապօրինի պատրսատելու, փոխադրելու, պահելու համար, որի զգալի չափերով փորձել է ապօրինի իրացնել ոմն քաղաքացու, որպես պատիժ նշանակել է ազատազրկում` 3 տարի ժամկետով:
Հաշվի առնելով Կ. Ճաղարյանի անվճարունակ լինելը, սույն քրեական գործի նախաքննության ընթացքում հանրային պաշտպան ներգրավելու որոշում կայացրել է վարույթ իրականացնող մարմինը՝ քննիչը:
Կարմեն Սահակյանը վերհիշելով դատարանի՝ արխիվ ուղարկված գործը, աում է, որ այդ գործում իր պաշտպանյալի նկատմամբ մեղմացնող հանգամանքներ առկաչեն եղել, ուստի իր աշխատանքը գնահատում է բավարար, քանի որ մեղադրյալը ստացել է այդ արարքի համար նախատեսված պատժի՝ ազատազրկման, նվազագույն չափը: «Գործը վաղուց է ավարտվել, վարույթն ուղարկվել է Հանրային պաշտպանի գրասենյակ: Միայն կարող եմ ավելացնել, որ հանդես եմ եկել պաշտպանական ճառով, բացի այդ դատարանը հաշվի առնելով նաև գործի այլ հանգամանքներ, նրա նկատմամբ նշանակել է մեղմ պատիժ»,-հավելում է հանրային պաշտպանը:
Կ. Սահակյանը հղում տալով Քրեական օրենսգրքի 62-րդ հոդվածին՝
պատասխանատվությունը և պատիժը մեղմացնող հանգամանքներին, հավելեց, որ Կ. Ճաղարյանը կարող էր և ավելի երկար ժամանակով անազատության մեջ լիներ, ուստի դատավճիռը ճիշտ չէր լինի բողոքարկել:
«Ես իրավունք ունեմ պաշտպան ունենալու» ծրագիրն իրականացվում է ԵՄ կողմից ֆինանսավորվող «Աջակցություն ՀՀ քաղաքացիական հասարակության կազմակերպությունների կարողությունների հզորացմանը» ծրագրի (“STRONG CSOs” ծրագիր) փոքր դրամաշնորհային նախագծի շրջանակներում «Գորիսի Մամուլի Ակումբ» և «Իրավունքների Տեղեկատվական Կենտրոն» հասարակական կազմակերպությունների կոնսորցիումի կողմից։
Սույն հոդվածի բովանդակության համար պատասխանատվություն է կրում միայն «Ես իրավունքունեմ պաշտպան ունենալու» ծրագիրը, և այն որևէ ձևով չի արտահայտում Եվրոպական միության տեսակետները:
