2020 թ. ՀՀ պետական բյուջեի նախագծում հանրակրթական դպրոցների մանկավարժների և սովորողների տրանսպորտային ծառայությունների փոխհատուցման նպատակով 3,5 անգամ ավելի շատ գումար է հատկացվելու. գալիք տարվա համար նախատեսված է 276 մլն դրամ 2019 թվականի 79 մլն դրամի փոխարեն` ընդգրկելով բոլոր մարզերը (նախկինում ընդգրկված էր միայն 7 մարզ)։
Դեռևս 2016 թվականին «Գորիսի մամուլի ակումբը» հանրապետությունում առաջին անգամ անդրադարձավ հանրակրթական դպրոցների մանկավարժների և դպրոցահասակ երեխաների տրանսպորտային ծառայությունների փոխհատուցումների հետ կապված խնդիրներին, այս գործընթացում առկա խոչընդոտներին, որոնք բացասաբար են ազդում հանրակրթության որակի ապահովմանը:
ՀՀ Կառավարությունը յուրաքանչյուր տարի պետական բյուջեից «Հանրակրթական դպրոցների մանկավարժներին և դպրոցահասակ երեխաներին տրանսպորտային ծառայությունների մատուցում» հոդվածով դրամական միջոցներ էր հատկացնում հանրակրթական դպրոցների այն ուսուցիչներին ու աշակերտներին, ովքեր սովորում կամ դասավանդում են այլ բնակավայրում: Այդ նպատակի` տրանսպորտային փոխհատուցումներն իրականացնելու համար 2016 թվականին պետական բյուջեից հատկացվել է 67 միլիոն 343 հազար դրամ, որից Սյունիքի մարզպետարանին` 25 մլն 800,5 հազար ՀՀ դրամ:
Տարեցտարի այդ գումարն ավելացավ, և ըստ մեր ուսումնասիրության պետական բյուջեից հատկացվող գումարները ՀՀ Կրթության և գիտության նախարարության, մարզպետարանների միջոցով իրականացվող գործընթացը հրապարակային և թափանցիկ չէր: Չկային հստակ մշակված չափորոշիչներ փոխհատուցումն իրականացնելու համար։
Հետագա տարիներին ևս մեր կազմակերպությունը տարբեր նախաձեռնությունների միջոցով շարունակել է բացահայտել և վեր հանել կոռուպցիոն ռիսկերը, պետական միջոցների օգտագործման արդյունավետության և ընդհանուր գործընթացի բարելավմանն ուղղված հարցեր:
