Սուսաննա Շահնազարյան
Մեղրեցի Կարո Կարապետյանի զեյթունի այգու մասին գիտեն գրեթե ամբողջ Հայաստանում: «Բան ու գործը» քանիցս ընթերցողներին է ներկայացրել նրա այգու անհավանական պատմությունն այն մասին, թե ինչպես է Կարոն, վաճառելով մայրաքաղաքում, Աբովյանում գտնվող իր բնակարանները, զեյթունի արմատակալներ ներկրում Հունաստանից և 2002թ. Մեղրիում առաջին անգամ հիմնում ձիթապտղի այգի: Ձիթենու պտղի առաջին բերքը ստանում է 2011 թվականին` 5.5 տոննա, իսկ 2012 թվականին` արդեն 10 տոննա: Տարիների հետ Կարոն ավելի ու ավելի է ընդլայնում իր գործը, ստացված բերքը տնային պայմաններում պահածոյացնում, այգում ոռոգման ցանց կառուցում: Տարիների հետո, ըստ Կարոյի, այգուց ստացվող բերքի ծավալներն ավելանում են, և օրախնդիր է դառնում մասնագիտացված արտադրության կզմակերպումը:
Խնդրի լուծման համար Կարոն 2012թ. դիմում է ՀՀ գյուղատնտեսության նախարարության «Գյուղատնտեսական ծրագրերի իրականացման գրասենյակ» ՊՀ «Համայնքների գյուղատնտեսական ռեսուրսների կառավարման և մրցունակության ծրագրի» կողմից հայտարարված մրցակցային դրամաշնորհների ծրագրի մրցույթին:
Նրա կողմից ներկայացված «Նոր տեխնոլոգիաների կիրառմամբ պահածոյած ձիթապտղի արտադրության հիմնում Մեղրիի տարածաշրջանում» նախագիծը ֆինանսական աջակցություն է ստանում:
«Դրամաշնորհային ծրագրի իրականացման համար որպես ֆերմեր ես բավական ներդրում եմ կատարել, մասնավորապես, վերանորոգել եմ 160 քառակուսի մետր օգտակար մակերեսով արտադրամաս, ինչպես նաև ձեռքբերել անհրաժեշտ սարքավորումներ: Սակայն ձիթապտղի արտադրության կազմակերպման, բնական պահածոյի արտադրման հիմնական և կարևոր տեխնիկան գնվել է դրամաշնորհի միջոցներով», -ներկայացնում է Կարոն« թվարկելով« որ դրանց թվում են չժանգոտվող կաթսաները« վակուում մակափակող մեքենան« օլեոտրոպեին դառնահամ նյութի հեռացման համար անհրաժեշտ սարքը և այլն: Ընդանուր առմամբ, նշված դրամաշնորհով Կարոն հնարավորություն է ստացել օրական մոտ մեկ տոննա ձիթապտուղ պահածոյացնելու արտադրողականություն ունեցող արտադրություն կազմակերպել: Դրամաշնորհի իրականացման արդյունավետության մեջ Կարոն կարևորում է ծրագրի ծառայություն մատուցող, տեխնիկական գիտությունների թեկնածու Ժիրայր Աղաջանյանի ներդրումը, ով ոչ միայն խորհրդատվություն է տրամադրել դրամաշնորհառուին, այլև աջակցել է ձեռքբերված սարքավորուների գործարկմանը:
Նոր տեխնոլոգիաների կիրառմամբ պահածոյած ձիթապտղի արտադրության հիմնումը, ըստ Կարոյի, կարևոր է նաև այն առումով, որ տարվա ընթացքում հնարավորություն է ստեղծվում 10-40 աշխատատեղի ստեղծման համար:
Կարոն ակնկալում է, որ դրամաշնորհային այս ծրագրի աջակցության արդյունքում անպայման կհաջողվի իրականացնել իր նպատակը. Մեղրիում ոչ միայն մրցունակ միրգ աճեցնել, այլև համային բարձր հատկանիշերով և պահանջարկ ունեցող վերամշակման արտադրություն կազմակերպել` տարեկան ստանալով ոչ պակաս, քան 150 տոննա ձիթապտուղ:
