Ինչպես տեղեկացնում է https://www.azdarar.am/ կայքը, Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեն աճուրդային եղանակով վաճառում է Սյունիքի մարզի Գորիս քաղաքի Ակ. Բակունցի անվ. թիվ 1 ավագ դպրոց» պետական ոչ առևտրային կազմակերպությանն անհատույց օգտագործման իրավունքով տրամադրված պետական սեփականություն հանդիսացող դպրոցի շենքի հիմնանորոգման ընթացքում ապամոնտաժված շինարարական նյութերը։
Հրապարակային ծանուցուման մեջ նշվում է, որ աճուրդին կարող են մասնակցել ֆիզիկական և իրավաբանական անձինք, ինչպես նաև համայնքները, որոնք մինչև աճուրդի բացմանը նախորդող աշխատանքային օրն անհրաժեշտ փաստաթղթերը աճուրդային հանձնաժողովին պետք է ներկայացնեն ք. Երևան, Զաքիյան 10 հասցեով։ Նույն տեղում նաև վաճառվում են դիտորդի տոմսերը։ Աճուրդը կկայանա կրկին Երևանում՝ Պետական գույքի կառավարման կոմիտեում ։ Ինչպես տեղեկանում ենք վերոնշյալ կայքից, դպրոցի շենքի ապամոնտաժված շինարարական նյութերի աճուրդով վաճառք կազմակերպվում է ոչ առաջին անգամ։
Բնականաբար, օգտագործված շինանյութերի հավանական գնորդների թվում անհամեմատ մեծ թիվ կկազմեն Գորիս կամ հարակից համայնքների բնակիչներ, որոնց համար, սակայն նշված աճուրդին մասնակցելու համար նվազագույնը երկու անգամ մայրաքաղաք մեկնելը դժվարությունների հետ է կապված (ոչ միայն համավարակի պատճառով ստեղծված իրավիճակում)։ Արդյո՞ք հնարավոր չէր աճուրդը կազմակերպել Գորիս քաղաքում, որի ընթացքում անհամեմատ ցածր գնով շինանյութ ձեռք բերելու հնարավորություն կունենային տեղացիները կամ համայնքը՝ անապահովներին աջակցելու նպատակով։
Սեփ․ լրատվություն
