Գորիսի պետական համալսարանում 2020-21 ուսումնական տարվա ընդունելության համար նախատեսվել է 20 անվճար և 200 վճարովի հիմունքներով ուսուցման տեղ։ Առավել մեծ թվով անվճար տեղ պլանավորվել էր էլեկտրոնիկա մասնագիտության համար, իսկ տնտեսագիտություն բաժնում նախատեսվել էր ընդունելություն կազմակերպել միայն վճարովի հիմունքներով՝ այդ նպատակի համար պլանավորվել 30 տեղ։
Ընդունելության քննությունների ավարտից հետո համալսարանը https://gorsu.am/ հրապարակել է արդյունքները, ըստ որի, անվճար հիմունքներով համալսարան է ընդունվել 13 դիմորդ, որոնցից մեկն օրենքով սահմանված կարգով՝ առանց մրցույթի։ Մնացած տեղերի մասին համալսարանի պաշտոնական կայքում տեղեկություն հրապարակված չէ, որոնք վերաբերում են կերպարվեստի և էլեկտրոնիկայի բաժիններին։ Ի դեպ, վերջին մասնագիտության առումով տեղեկություններ չկան նաև վճարովի 20 տեղի համար հայտարարված ընդունելության արդյունքների մասին, քանի որ դիմորդներից և ոչ մեկը դրական գնահատական չի ստացել։
Նույն աղբյուրի տեղեկատվությամբ, վճարովի հիմունքներով համալսարան է ընդունվել 48 դիմորդ։ Ընդհանուր հաշվով, համալսարանում 132 տեղ թափուր է մնացել։ Ընդորում, 26 տեղ տնտեսագիտության, 20-ական էլեկտրոնիկա, տարրական մանկավարժություն և մեթոդիկա, 12-ական՝ մաթեմատիկա, կենսաբանություն, կառավարում, 14 պատմություն, 11 հայոց և 5` անգլերեն լեզու գրականություն բաժիններում։
Հարկ է նշել, որ անվճար հիմունքներով ընդունված դիմորդների անցումային բալը հիմնականում միջինից բարձր է միայն հումանիտար առարկաների պարագայում։ Ինչպես և նախորդ տարիներին, որոշ բաժիններում անցումային միավորները չեն անցնում 8-ը։ Այդպիսի արդյունքներով յոթ դիմորդ դարձել է համալսարանի ուսանող, ընդ որում առավել ցածր միավորով ընդունվողները նախընտրել են կառավարում, տնտեսագիտություն բաժինները։ Ցավոք, այդպիսի արդյունքներ են գրանցվել նաև հայոց լեզվի և գրականության, ինչպես նաև տարրական մանկավարժություն և մեթոդիկա բաժիններում։ Այս մասնագիտությամբ անցողիկ բալը տատանվում է 7.50-ի և 9.25-ի միջև։
Ընդհանուր առմամբ, Հայաստանի 35 բուհերում թափուր է մնացել 12230 տեղ և արդեն իսկ մեկնարկել է թափուր տեղերի դիմում-հայտերի առցանց եղանակով ներկայացումը։
Դժվար է ենթադրել, արդյո՞ք այդքան դրական միավոր հավաքած դիմորդ ունեցել է Գորիսի համալսարանը, թե՞ ուսանողական նստարաններին կնստեն անգամ անբավար արարդյունքներ գրանցած դիմորդները։
Սեփ․ լրատվություն