ՀՀ կառավարությունը և Գերմանիայի Դաշնային Հանրապետությունը համաձայնության են եկել, որով KfW/Եվրոպական ներդրումային բանկի և Եվրոպական միության կողմից Հայաստանում ֆինանսավորվել է «Կոմունալ ենթակառուցվածքների ծրագիր-Փուլ 3», որով նախատեսվում էր Շիրակ, Լոռի, Վայոց Ձոր, Սյունիք և Գեղարքունիք մարզերի մի շարք քաղաքներում և շրջակա գյուղերում ջրամատակարարման ցանցի վերականգնում, նորացում և ընդլայնում, ինչպես նաև մի շարք հրատապ միջոցառումների իրականացում կոյուղու համակարգում։
Թիրախ համայնքներից է նաև Տաթևը, որով նախատեսվում էր Շինուհայր գյուղի ջրամատակարարման համակարգ բարելավում․ ակնկալվում էր, որ այդ նախագծով կլուծվի Շինուհայրի խմելու ջրի հարցը։
Ըստ ՀՀ ՏԿԵՆ ջրային կոմիտեի հրապարակած տեղեկանքի, ծրագիրը նախատեսվում էր իրականացնել 2015-2018թթ ընթացքում, սակայն մինչև այժմ շինարարությունը չի մեկնարկել։ Նույնը վերաբերում է նաև Տաթև համայնքի Հարժիս բնակավայրին:
Տաթևի համայնքապետարանի տեղեկացմամբ, 2017թ․ «ՋԻՆՋ» ինժիներախորհրդատվական ընկերությունը եղել է Շինուհայրում, կազմվել է նախահաշիվ, որով Շինուհայր բնակավայրում իրականացվելիք ծրագրի նախնական գինը կազմել է մոտ 450 մլն դրամ։ Նախատեսված էր կառուցել 1,4 կմ նոր ջրատար, 300 տոննա տարողությամբ օրվա կարգավորիչ ջրամբար և մոտ 11,1 կմ բաշխիչ ցանց։ Անցել է գրեթե երեք տարի, սակայն շինարարության մասին դեռևս խոսք չկա։
Ոչ պաշտոնական աղբյուրների համաձայն, նաև շինարության իրականացման համար մրցույթ է անցկացվել, հայտնի է հաղթողի անունը, սակայն Շինուհայրում և Հարժիսում շարունակում են սպասել, թե, երբ վերջապես, խնդրի լուծման առաջին քայլերը կսկսվեն։
Իսկ մինչ այդ, ինչպես արդեն նշվել է մեր հրապարակած հոդվածում, Տաթև համայնքի բյուջեից տարեկան մոտ 5-6 մլն դրամ ծախսվում է բնակավայրերում, մասնավորապես Շինուհայրում, Խոտում, Հարժիսում և Հալիձորում ջրամատակարարում ապահովող 5 բանվորների աշխատավարձ վճարելու համար, այն դեպքում, երբ 2016 թ․ Տաթև համայնքի ավագանու որոշմամբ, համայնքի սեփականություն հանդիսացող ջրամատակարարման ցանցը սեփականության իրավունքով անհատույց հանձնվել է «Հայջրկմուղկոյուղի» փակ բաժնետիրական ընկերությանը։