Գորիս համայնքի ավագանու որոշմամբ Որոտան բնակավայրի սահմանամերձ հատվածում գտնվող 14077,5 քառ․մ հողատարածքը նվիրատվությամբ օտարվել է համայնքի բնակիչ Մհեր Տատինցյանին։ Համայնքի ղեկավար Առուշ Առուշանյանի խոսքով այն նախաձեռնությունները, որոնք ուղղված են սահմանամերձ բնակավայրերում ներդրումների իրականացմանը, մշտապես կխրախուսվեն համայնքային իշխանության կողմից, իսկ Մհեր Տատինցյանի՝ սահմանից մի քանի մետր հեռավորության վրա այգեգործության զարգացումը, նրա կարծիքով նաև պաշտպանական նպատակ ունի։
Նշենք, որ ավագանու նիստի որոշումների նախագծով նախատեսվում էր այդ հողատարածքներն օտարել բաց դասական աճուրդով։
Ավագանու մեկ այլ որոշմամբ հաստատվեց համայնքի սեփականություն հանդիսացող`տասը տարի ժամկետով, մրցութային հիմունքներով վարձակալությամբ օգտագործման տրամադրվող գյուղատնտեսական նշանակության հողամասերի ցանկը՝ համապատասխան վարձաչափերով: Գյուղատնտեսական գործունեության նպատակով վարձակալվող հողատարածքների տարեկան առավելագույն գին հաստատվեց 60, նվազագույնը՝ 15 հազար դրամ։
Ավագանիները կողմ քվեարկեցին նաև Շվեյցարիայի զարգացման գործակալության և ԳԴ տնտեսական զարգացման և համագործակցության նախարարության կողմից դրամաշնորհային ծրագրի մրցույթին Գորիս համայնքի մասնակցությանը համաձայնություն տալու մասին հարցին։ Ծրագրով նախատեսվում է համայնքի՝ Շորին ձոր անտառամերձ հատվածում արկածային տուրիզմի զարգացման համար անհրաժեշտ ենթակառուցվածքների ապահովմանը։ Համայնքի ղեկավարը, նշելով, որ նշված տարածքն իր տեսակով յուրահատուկ է տարածաշրջանում և կարող է մեծ թվով այցելուներ ունենալ, շեշտեց, որ հետևողական պետք է լինել, որպեսզի բնական միջավայրն արհեստականորեն չվերափոխվի։
Ավագանու անդամներն անդրադարձան նաև համայնքային իշխանության աշխատակազմի՝ քաղաքաշինության բաժնի աշխատակիցների համալրման, ոռոգման ջրի անխափան մատակարարման համար առուների մաքրման հարցերի։
Սեփ․լրատվություն
