Գորիս համայնքի ավագանու՝ հուլիսի 6-ին կայացած արտահերթ նիստում քննարկման էր ներկայացված 11 հարց։ Օրակարգի` 12-րդ լրացուցիչ հարցով ավագանին ի գիտություն ընդունեց համայնքի ընթացիկ տարվա բյուջեի երկրորդ եռամսյակի կատարման հաշվետվությունը։ Համայնքապետարանի ֆինանսատնտեսական և եկամուտների հավաքագրման բաժնի պետ Նարեկ Մնացականյանի ներկայացմամբ, 2021թվականի առաջին կիսամյակում հողի հարկի հավաքագրման տարեկան պլանը կատարվել է 10, իսկ վարձակալությանը՝ 19 տոկոսով։ Այս ցուցանիշը, ըստ բաժնի պետի, հիմնականում պայմանավորված է Արցախյան երկրորդ պատերազմից հետո որոշ հողատարածքների վարչական սահմանների փոփոխությամբ:
Ավագանին համաձայնություն տվեց «Գորիս քաղաքի Հայրենական պատերազմի զոհերի հիշատակի հուշարձանին կից տարածքում ՀՀ և Արցախի Հանրապետության պաշտպանության մարտական գործողությունների կամ զինվորական ծառայության ընթացքում զոհված զինծառայողների և մարտական գործողությունների մասնակիցների, հասարակության ու պետության հանդեպ նշանակալի ծառայություններ մատուցած այլ անձանց հուղարկավորությունը կազմակերպելու համար պանթեոն կառուցելու նպատակով 2000քմ մակերեսով հողամաս առանձնացնելու» մասին հարցին:
Ավագանու մյուս հարցերը վերաբերում էին հողերի նշանակության փոփոխությանը, աճուրդային եղանակով օտարմանը։
Ավագանին միաձայն հավանություն տվեց Գորիսի կանանց զարգացման «Ռեսուրս կենտրոն» հիմնադրամին՝ 10 տարի ժամկետով Վերիշեն գյուղի արվեստի կենտրոնի շենքի առաջին հարկից 127.0քմ տարածք անհատույց օգտագործման իրավունքով տրամադրման հարցին. կազմակերպությունը նախատեսում է այդ տարածքում արվեստների կենտրոն հիմնադրել։
Սեփ. լրատվություն
