Հուլիսի 9-10-ը Գորիսի մամուլի ակումբում կայացավ երեք հասարակական կազմակերպությունների ներկայացուցիչների մասնակցությամբ աշխատանքային հանդիպում, որի ընթացքում տրվեց «Սյունիքում ՏԻՄ ռազմավարության բարելավում` ուղղված ճգնաժամերի կառավարմանն ու հանրային պաշտպանությանը» ծրագրի մեկնարկը՝ կարճ անվանումը «ՊրոՓաբլիկ»։
Ծրագրի նպատակն է՝ նպաստել Սյունիքի մարզում բնակչության ապահով և անվտանգ կյանքի համար կենսական նշանակություն ունեցող խնդիրների բացահայտմանն ու համայնքային զարգացման ռազմավարության մշակման գործում տեղական իշխանությունների ներգրավմանը:
Ծրագիրն իրականացվում է «Լրագրողներ հանուն ապագայի» հասարակական կազմակերպության (ԼՀԱ), Գորիսի մամուլի ակումբի (ԳՄԱ) և «Ծիածան» Առաջնորդների Կրթական Կենտրոն ՀԿ-ի կողմից ձևավորված կոնսորցիումի կողմից՝ «Տվյալներ հաշվետու և թափանցիկ գործունեության համար» (ԴԱՏԱ) ծրագրի շրջանակներում` Եվրասիա համագործակցություն հիմնադրամի և ծրագրի գործընկերների հետ համագործակցությամբ՝ ԱՄՆ Միջազգային զարգացման գործակալության օժանդակությամբ։
Հանդիպման ընթացքում կոնսորցիումի անդամ կազմակերպությունները կնքեցին համագործակցության հուշագիր։ Մշակվեց և հաստատվեց գործընկերների արտաքին և ներքին հաղորդակցության ընթացակարգը, քննարկվեցին ծրագրային գործողություններն ու կատարվեց առաջին եռամսյակի գործողությունների պլանավորում։
Ծրագրի տևողությունը մեկ տարի է, որի ընթացքում ուսումնասիրվելու են կառավարման համակարգում մարդու անվտանգության ինստիտուցիոնալ բաղադրիչները, Սյունիքի բնակչության կարիքներն ու ակնկալիքները՝ գյուղատնտեսության, առողջապահության, կրթության, անվտանգության և այլ ոլորտներում։ Ստացված արդյունքները ներկայացվելու են Սյունիքի ՏԻՄ-երի, պետական և հասարակական շահագրգիռ այլ կառույցների ուշադրությանը՝ համատեղ ուժերով համայնքային քաղաքականություն մշակելու նպատակով։
Հավելյալ տեղեկություններ կարող եք ստանալ ProPublicProject ֆեսյբուքյան խմբից կամ դիմել՝ գրելով propublicproject@gmail.com էլեկտրոնային հասցեին կամ զանգահարելով 096-20-45-67 հեռախոսահամարին։
***
Սույն միջոցառումը իրականացվում է Ամերիկայի ժողովրդի աջակցությամբ` ԱՄՆ Միջազգային զարգացման գործակալության միջոցով: Այստեղ արտահայտված տեսակետները միմիայն «Լրագրողներ հանուն ապագայի» ՀԿ-ինն ու ծրագրի գործընկերներինն են և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները:
