Շարունակվում է հոկտեմբերի 17-ին Գորիս, Տեղ, Տաթև համայնքներում կայանալիք ՏԻՄ ընտրությունների թեկնածուների նախընտրական քարոզարշավը։ Տաթև համայնքի ավագանու ընտրությանը մասնակցող «Շանթ դաշինք» ազգայնական կուսակցությունը ընտրությունների է գնում «Միասին դեպի անվտանգ և համերաշխ համայնք» կարգախոսով։ Դաշինքը Տաթև համայնքում առաջադրել է 18 թեկնածու, որի ցուցակը գլխավորում է Սամվել Լալայանը։
«Շանթ դաշինք»-ի ծրագրում ընդգրկված է ինը ուղղություն, որոնք վերաբերում են «համայնք պետություն-հանրություն կապին», անվտանգային, ամրաշինական նախաձեռնություններին, ավագանի-համայնքի ղեկավար համագործակցությանը, ներդրողների համար բարենպաստ պայմանների ապահովմանը, համայնքի բյուջեի եկամուտների ավելացմանը, սոցալական, բնապահպանական, կրթության, մշակույթի զարգացմանն ուղղված ծրագրերին։
Զբոսաշրջային կենտրոնի հավակնող Տաթևում ներդրողների համար բարենպաստ միջավայր ապահովելու համար դաշինքը կարևորում է հարկային արտոնությունների սահմանումը։ Ըստ նախընտրական ծրագրի, «Յուրաքանչյուր ներդրող, ինչպես նաև տեղացի գործարար պետք է երեք տարով ազատվի ստեղծած ձեռնարկության զբաղեցրած տարածքի համար հողի հարկի և գույքահարկի վճարումից, եթե ստեղծում է առնվազն 15 աշխատատեղ և պարտավորվում է իր ձեռնարկության աշխատողներին ամսական վճարել աշխատավարձ՝ ոչ պակաս, քան տվյալ պահին օրենքով նախատեսված ամսական նվազագույն աշխատավարձի եռապատիկը»։
