«Ռեգիոն 5+» մեդիա հարթակի երկրորդ թողարկման դիտակետում Հայաստանի սահմանամերձ բնակավայրերն ու այնտեղ ապրող մարդիկ են: Մեր տեսախցիկները շրջել են Հայաստանի սահմանների երկայնքով՝ հայ-թուրքական և հայ-ադրբեջանական հատվածներում. թակել ենք բնակարանների դռներն ու լսել մարդկանց, ովքեր բացի համընդհանուր դժվարություններից, կանգնած են այլ խնդիրների առաջ: 44 -օրյա պատերազմը հայրենիքի զգալի մասի և հայորդիների կորստից զատ, մարտահրավերների առաջ կանգնեցրեց մեր երկիրը: Պատերազմը փոխեց Հայաստանի սահմանները. դրանք մոտեցան Ադրբեջանին: Հակառակորդը 44-օրյա պատերազմից հետո էլ շարունակեց առաջխաղացումը՝ ներխուժելով ՀՀ սուվերեն տարածք: Սահմանամերձ հատվածում ապրող բնակիչը մնաց մենակ՝ թշնամու դեմ: Անվտանգության մարտահրավերներին դեռ առաջիկա թողարկումներում կանդրադառնանք: Այս հաղորդման շրջանակներում փորձել ենք հասկանալ՝ ինչ դժվարությունների առաջ կանգնեցին սահմանամերձ համայնքների բնակիչները, հատկապես հայ-ադրբեջանական: Այսօր վտանգված է շատերի ապրուստի միջոցը: Պատերազմից հետո սահմանների փոփոխության արդյունքում արոտավայրերի զգալի մասն այժմ գտնվում է թշնամու տարածքում։ Բացի արոտավայրերի կորստից, անասունները հաճախակի անցնում են հակառակորդի տարածք, որոնց երբեմն հնարավոր չի լինում հետ վերադարձնելը: «Պետական սահմանի մասին» օրենքի համաձայն՝ սահմանային գոտին այն տարածքն է, որը Հայաստանի պետական սահմանագծից ծավալվում է դեպի հանրապետության տարածքի խորքը` մինչև հինգ կիլոմետր լայնությամբ: Մեկ տարի առաջ Հայաստանի կառավարությունը փոփոխություն կատարեց սահմանամերձ գյուղերի ցանկում: Այս կերպ կառավարությունը հնարավորություն տվեց այդ գյուղերի բնակիչներին օգտվելու սոցիալական որոշ արտոնություններից: Ասացին՝ սահմանամերձ գյուղում ապրելը պիտի լինի առավելություն: Դա իսկապե՞ս այդպես է:
