Վերջին օրերին ձյան աննախադեպ տեղումները դժվարանցանելի էին դարձել Գորիսի ներհամայնքային փողոցները։ Գորիս համայնքի «Բարեկարգում» ՀՈԱԿ-ի տնօրեն Արտակ Առուշանյանի խոսքով՝ իրենք աշխատում են արտակարգ ռեժիմով։
ՀՈԱԿ-ը ձնամաքրման աշխատանքներն իրականացնելու համար գործի է դրել ամբողջ տեխնիկական միջոցները։ Սակայն, ըստ տնօրենի, ձնամաքրման աշխատանքների համար բազմաֆունկցիոնալ մեքենան, որը նաև ամռանը ծառայում է որպես ջրցան մեքենա, ճանապարհների մաքրման համար պակաս արդյունավետ է։ «Ձնամաքրման աշխատանքներ իրականացվել են ոչ միայն Գորիս քաղաքում, այլև համայնքի բոլոր բնակավայրերում և առկա մեքենաներով հնարավոր է եղել հասնել նրան, որ փակ ճանապարհներ չլինեն»,-ասում է Ա․ Առուշանյանը։
Տնօրենի խոսքով՝ անհրաժեշտ տեխնիկա ունենալու դեպքում կկարողանային նաև մայթերի մաքրման աշխատանքներն իրականացնել, այսինքն որակով և արագ կերպով կկարողանային իրականացնել սպասարկումը։ Մաքրվել են միայն եթևեկելի հատվածները։ «Քաղաքացիները, տնտեսվարողներն էլ կարող են մեզ օգնել, մաքրել իրենց առանձնատների, օբյեկտների բակը, բայց չեն ներգրավվում, ակնկալում են, որ մենք պարտավոր ենք նաև իրենց տան մայթերի ձյունը հեռացնել», -նշում է նա։
Բարեկարգման աշխատանքների հետ կապված մյուս խնդիրը, տեխմիջոցներից բացի, պայմանավորված է նաև քաղաքում ներքին ջրագծի ցանցի վերանորոգման ընթացիկ աշխատանքներով, քանի որ, բազմաթիվ փողոցներ, հատկապես կենտրոնական մասում, գտնվում են դեռևս անբարեկարգ վիճակում, և այդ պատճառով լրացուցիչ անհարմարություն են ստեղծվել կանոնավոր երթևեկության համար։
Կենտրոնի տնօրենը mediapoint.am-ի հետ զրույցում նշում է նաև, որ ձնահեռացման աշխատանքներն իրականացվել են շուրջօրյա, բայց ռեսուրսները բավարար չեն անգամ աշխատուժի առումով։ Խոսքը, սակայն ըստ Ա․ Առուշանյանի, չի վերաբերում ավազի կամ աղի պաշարներին։ Չնայած տեղումների ծավալն աննախադեպ էր, այնուամենայնիվ, ավազի խնդիր չեն ունեցել։
Ի դեպ, ինչպես տեղեկացնում են ճանապարհային ոստիկանությունից, բարեբախտաբար, այս օրերին ճանապարհատրանսպորտային դեպքերի թիվը Գորիս համայնքում ավելին չի եղել, քան մինչ այդ։
