Հայոց ցեղասպանության 107-րդ տարելիցը համընկավ հերթական փուլի հետ, երբ Հայաստանն ու Թուրքիան կրկին փորձում են կարգավորել հարաբերությունները, իսկ հայ հանրությունը քննարկում է հնարավոր նախապայմանների հարցը: Ի տարբերություն նախորդ շրջափուլերի, Հայաստանն այսօր բոլորովին այլ իրողությունների ու մարտահրավերների առաջ է կանգնած: Հետպատերազմական ծանր հետևանքներ, Արցախի հարցում խիստ անորոշ իրավիճակ: Իսկ արցախյան հիմնահարցը և Ադրբեջանի տարածքային ամբողջականության ընդունումը մշտապես Թուրքիայի համար եղել է Հայաստանի հետ հարաբերությունները կարգավորելու նախապայման: Հայաստանի իշխանությունները թուրքական կողմի հետ հանդիպումներից հետո պնդում են, որ չկան նախապայմաններ, և որ Հայաստանը, ինչպես նախորդ տարիներին, այսօր էլ շահագրգիռ է հարևանի հետ հարաբերությունները կարգավորել, բայց առանց նախապայմանների: Հասարակական-քաղաքական շրջանակները պնդում են՝ Հայաստանը, պարտվելով 44-օրյա պատերազմում և համաձայնվելով զիջումների գնալ, արդեն իսկ կատարել է թուրքական նախապայմանները: Առաջիկայում տեղի կունենա Հայաստանի և Թուրքիայի հատուկ բանագնացների երրորդ հանդիպումը՝ դարձյալ Վիեննայում: Նրանց առաջին հանդիպումը 2022թ.-ի հունվարին էր՝ Մոսկվայում, երկրորդ հանդիպումը՝ մոտ մեկ ամիս անց՝ Վիեննայում։ Ինչի՞ մասին են բանակցում Ռուբինյանն ու Քըլըչը։ ՀՀ ԱԳՆ մամուլի քարտուղար Վահան Հունանյանը մի կետ է բացահայտել։ Հայաստանը Թուրքիային առաջարկել է առաջին փուլով բացել ցամաքային սահմանը դիվանագիտական անձնագրեր կրող անձանց համար, բայց թուրքական կողմը հապաղում է։ Արդյո՞ք այդ հանդիպումների ժամանակ գոնե հպանցիկ խոսվում է Հայոց ցեղասպանության մասին, հայտնի չէ։ Իսկ հայ հանրությանը շարունակում է հուզել մի հարց․ երբևիցե Թուրքիան կճանաչի՞ Հայոց ցեղասպանությունը։
