Սյունիքի մարզում ավարտվել է Տեղական ժողովրդավարության դպրոցի շուրջ մեկ ամիս տևած դասընթացների շարքը, որի ընթացքում մարզի բոլոր բնակավայրերից ընտրված երեսունից ավելի երիտասարդներ հնարավորություն են ունեցել մասնակցելու Տեղական ինքնակառավարման ոլորտին առնչվող բազմաթիվ դասընթացների։ Դասընթացների ավարտից հետո անհրաժեշտ թեստը հանձնելուց հետո նրանք մասնակցել են ծրագրի շրջանակներում հայտարաված դրամաշնորհային ծրագրերի մրցույթին:
Հունիսի 12-ին երիտասարդները Գորիսում կազմակերպված միջոցառման ժամանակ փորձագետներին ներկայացրեցին իրենց գաղափարների շուրջ պատրաստված դրամաշնորհային հայտերը։ Մոդերատորները իրենց դիտարկումները ներկայացրին առաջարկվող նախագծերին։ Ակնկալվում է, որ վերջնական հաստատումից հետո մարզի համայնքներում կիրականացվի տասը ծրագիր՝ միջինը մեկ միլիոն դրամ բյուջեով։
ՏԺԴ շրջանավարտները միջոցառման պաշտոնական մասի բացումից հետո բաժանվեցին նախապես ստեղծված խմբերի և հստակեցնելով իրենց կողմից ներկայացված գաղափարները՝ այն դարձրեցին ծրագրային առաջարկներ:
Օրվա ավարտին երիտասարդները ստացան ՏԺԴ մասնակցության հավաստագիր և «Գորիսի մամուլի ակումբի» կողմից նվերներ այն երիտասարդներին, ովքեր դասընթացների փուլում առավել ակտիվ էին։
Նախագիծը իրականացվում է Համայնքների Ֆինանսիստների Միավորում (ՀՖՄ), Եվրասիա համագործակցություն հիմնադրամ (ԵՀՀ) և Տեղեկատվական համակարգերի զարգացման և վերապատրաստման կենտրոն (ՏՀԶՎԿ) ԱՄՆ ՄԶԳ «Հանրային մասնակցություն տեղական ինքնակառավարմանը» (ՀաՄաՏեղ) ծրագրի շրջանակներում : Սյունիքի մարզում ծրագիրը համակարգում է Գորիսի մամուլի ակումբ ՀԿ-ն:
