Մարիամ Մաթևոսյան
Արդեն ութ տարի է, ինչ Գորիսի Անկախության 1 և Մաշտոցի 1 շենքերի հարևանությամբ տեղադրված «փոքր դաշտը» տվյալ շենքերի ու հարակից փողոցների երեխաների համար վերածվել է տարածքի, որտեղ կարելի է ակտիվ հանգիստ կազմակերպել: Դաշտն իսկական ֆուտբոլային հարթակ է, բոլոր նրանց համար, ովքեր սիրում են ֆուտբոլ սպրոտաձևը: Այստեղ մեծերն ու փոքրերը խաղում են հերթափոխով:
2004 թվականին ՈՒԵՖԱ-ն որոշում կայացրեց ֆուտբոլի զարգացման եւ մասսայականացման, ինչպես նաև ֆուտբոլի «սոցիալական պատասխանատվության» շրջանակներում իրականացնել «Փոքր դաշտեր» նախագիծը` որոշակի ներդրում կատարելով ՈՒԵՖԱ-ի անդամ երկրներում: Հայաստանը ևս ընդգրկվեց այդ մեծ ծրագրում:2005-2007 թթ. Հայաստանի Ֆուտբոլի Ֆեդերացիան` իրականացնելով լրացուցիչ ներդրումներ, Երևանում և Հայաստանի մարզերում կառուցեց 42 «Փոքր դաշտեր», որոնք տրամադրվեցին տեղական համայնքներին:
Այսօր Հայաստանում և Լեռնային Ղարաբաղում Հայաստանի ֆուտբոլի ֆեդերացիան կառուցել և տեղադրել է շուրջ 100 փոքր դաշտեր, որոնք ծառայում են Հայաստանում և Լեռնային Ղարաբաղում մանկապատանեկան ֆուտբոլի զարգացմանը, ֆուտբոլի մասսայականացմանը: Նմանատիպ փոքր դաշտ տեղադրվել է նաև Գորիսում:
Այս տարիներին փոքր դաշտում պարբերաբար անց է կացվում ֆուտբոլային և սպորտային մրցաշարներ, ֆուտբոլային պարապմունքներ, բայց վերջին ժամանակներս դաշտը գտնվում է ոչ այդքան բարեկարգ վիճակում. «պատռվել են» հատակի գորգերը, դաշտի կողային բազրիքները: Իսկ վերջերս էլ երեխաների անփութության պատճառով դարպասներից մեկը՝ իր կողային եզրույթներով, ընկել է ուղիղ դաշտի մեջ: «Քամիններից արդեն թուլացել էր, թեթևակի գնդակի հարվածից կընկներ մեր վրա էր: Բացի այդ, սկսել էր հաճախակի ճճռալ, մենք էլ որոշեցինք պոկել»,-պատմում է Գևորգը ու շարունակում ընկերների հետ կարտ խաղալ դաշտի գորգին:
Հիմա երեխաները ֆուտբոլ խաղում են մեկ դարպասով ու խոստովանում, որ առաջվա նման հաճախակի դաշտ չեն իջնում. «Մեկ դարպասով խաղալն անհետաքրքիր է, մեր փոխարեն այստեղ փոքրերն են խաղում»,-ասում է 14 ամյա Գոռը, ում նախաձեռնությամբ էլ իր ընկերախումբը դիմել է Գորիսի քաղաքապետին՝ դաշտը բարեկարգելու համար: Անցած տարի ևս քաղաքապետարանը որոշակի աշխատանքներ է տարել դաշտում, բայց երեխաներն անհրաժեշտ պահպանություն չեն կատարում:
