Covid-19-ի պայմաններում հազարավոր մարդկանց կյանքը փոխվել է՝ սահմանափակվելով տանը և էկրանի մոտ անցկացրած ժամանակով։ Շատերի համար ինտերնետը շատ արագ դարձավ սովորելու, զարգանալու, օնլայն աշխատանք գտնելու, անգամ ընտանիք կազմելու հնարավորություն:
19-ամյա Ինեսա Սարգսյանը սովորում է Հայաստանի ամերիկյան համալսարանի «Անգլերեն և հաղորդակցություն» բաժնում: Սահմանափակումների ընթացքում հայրենի գյուղում էր՝ Խոզնավարում, դասերին մասնակցում էր հեռավար։ Նա պատմում է, որ այդ ընթացքում ոչինչ չկար անելու և ձանձրալի էր ամբողջ օրը տանը մնալով, ժամանակը վատնել միայն սոցիալական ցանցերում: Telegram սոցիալական ցանցի խմբերից մեկի հայտարարությունում հանդիպել է մարքեթինգային ընկերության աշխատանքային հայտարարության: Աշխատանքի ընդունվելը և վճարումը կատարվել է օնլայն, իսկ հիմնական զբաղմունքն եղել է սոցիալական մեդիայի մարքեթինգ, գովազդների և արշավների կառավարում: «Ժամային սահմանափակում չկար, օրական աշխատում էի միջինը չորս ժամ և ամենակարևորը տրանսպորտի գումար չէի ծախսում, աշխատելով տանից և ինձ հարմար ժամերի»,- ասում է Ինեսան:
2020 թվականին համավարակի դեմ պայքարում սոցիալական հեռավորության պահպանման և շարժման սահմանափակումների ժամանակահատվածում ինտերնետ կապը կարևոր էր բոլորի համար: Ինտերնետի հասանելիությունը բազմազան հնարավորություններ է ընձեռում նույնիսկ այս դժվար ժամանակներում։ Մարդիկ ինտերնետից ամենից հաճախ օգտվում են հաղորդակցվելու, այդ թվում նաև զանգեր, հաղորդագրություններ ուղարկելու, ինչպես նաև սոցիալական ցանցերից օգտվելու և լրատվություն ստանալու համար: Մինչև համավարակ, աշակերտների մեծ մասն ինտերնետից օգտվում էին որպես ժամանցի կամ ծանոթությունների համար: Համավարակից հետո, ինչպես աշակերտները, այնպես էլ ուսանողները, դասերը շարունակում էին հեռավար: Այժմ արդեն սկսվել է նոր ուսումնական տարին, և նրանք մեկ տարվա դադարից հետո շարունակում են դասերը: Մի մասը մեծ ուրախությամբ է գնում դասի, որոշներն արդեն հարմարվել են հեռավար կրթությանը, պատճառաբանելով, որ դասերի զուգահեռ, տանը մնալով, կարողանում են նաև աշխատել օնլայն հարթակներում, գումար վաստակել:
Ինտերնետը իր մեջ պարունակում է բազմազան տեղեկատվական ծառայություններ և դրանից օգուտ քաղելը կախված է այն հանգամանքից, թե ինչպես և ինչ նպատակով է այն օգտագործվում։ Այսօր գրեթե չկա աշխատանքային մի ոլորտ, որտեղ չի օգտագործվում կամ ազդեցություն չունի ինտերնետը, թեև համացանցը մինյանց հետ կապի մեջ լինելու մեծ հնարավորություններ է ընձեռում մարդկանց: Այն ունի ինչպես դրական, այնպես էլ բացասական կողմեր, և մարդը պետք է այն ճիշտ օգտագործի: Բնակչության մեծ մասը երբեմն օրվա ընթացքում կանոնավոր չսնվելով համացանցում չափից շատ ժամանակ հատկացնելով և գիշերը քնելու փոխարեն ևս շարունակում են աշխատանքը, որն էլ առաջացնում է մի շարք հիվանդություններ: Մարդիկ իրական շփումը նախընտրում են փոխարինել ինտերնետային հաղորդակցությամբ, որն էլ տանում է հասարակությունից մեկուսացման: Մեծահասակների խոսքով վերջին ժամանակներս սոցիալական ցանցերի պատճառով մարդիկ ռոբոտացել են: Նրանք բողոքում են, ասելով, որ ինտերնետը միշտ չէ դրական ազդեցություն թողնում: Շեշտելով, որ վերջին շրջանում համացանցում հաճախ են կեղծ և իրականությանը չհամապատասխանող տեղեկություններ տեղադրում և իրենց հոգեկան վիճակն ավելի է լարվում:
Ինտերնետից օգտվելու ամենատարածված միջոցը բջջային հեռախոսն է։ Դպրոցական երեխաները ավելի շատ օգտվում են facebook, tik tok, youtube, սոցիալական ցանցերից, երիտասարդները viber, facebook, messenger, instagram, իսկ միջին հասակի մարդիկ՝ Google և Youtube-ից: Նշված կայքերում որոշները օրվա ընթացքում ժամանակ են ծախսում որպես եկամտի կայուն աղբյուր, իսկ որոշները շփվում են ընկերների հետ կամ պարզապես դիտում ֆիլմեր:
Սույն հոդվածը հրապարակվել է ԵՄ ֆինանսական աջակցությամբ: Հոդվածը արտացոլում է հեղինակի կարծիքը և պարտադիր չէ, որ արտացոլի ԵՄ տեսակետը։
