Գորիս բժշկական կենտրոնն իր ֆեյսբուքյան էջում տեղեկություն է տարածել այն մասին, որ COVID-19-ի ՊՇՌ թեստավորում իրականացվում է միայն մայրաքաղաքում՝ վճարովի հիմունքներով։
Դրան զուգահեռ, հանրության մեջ կարծիքներ էին հնչեցվում այն մասին, որ թեստավորվել կարելի է նաև Գորիսում։
Այսօր mediapoint.am-ին տված հարցազրույցում կենտրոնի տնօրեն Դավիթ Մաշուրյանը ևս մեկ անգամ հաստատեց, որ թեստավորումը իրականացվում է միայն մայրաքաղաքում։ Խոսքը վերաբերում է ՀՀ Առողջապահության նախարարության թիվ N 65 որոշման 5․1 կետի, որում նշվում է, որ հոկտեմբերի մեկից աշխատողները յուրաքանչյուր 14 օրը մեկ պետք է ներկայացնեն կորոնավիրուսային հիվանդության բացասական արդյունքը հավաստող, առավելագույնը 72 ժամ վաղեմության տեղեկանք։
ՊՇՌ հետազոտությունն իրականացվում է աշխատողի հաշվին և ոչ աշխատանքային օրերի. թեստավորման համար աշխատանքային օրերին աշխատանքից բացակայությունը գործատուի կողմից դիտարկվում է անհարգելի։
Կորոնավիրուսային հիվանդության (COVID-19) դեմ կատարվող պատվաստումների հակացուցումներ ունենալու դեպքում բնակիչները պետք է դիմեն տեղամասային բժշկին, ով հետազոտությունների արդյունքում որոշում է, թե արդյո՞ք, կարող է պատվաստվել, թե՝ ոչ։
Մաշուրյանը նաև ընդգծում է, որ Գորիսում նմուշառում իրականացվում է միայն բժշկական ցուցումների ժամանակ՝ պոլիկլինիկայում, որն ուղարկվում է Կապան։ Ըստ նրա, բոլոր մեխանիզմները նեդրվում են, որպեսզի բնակիչները պատվաստվեն։
Սեպտեմբերի 15-ի տվյալներով Գորիս քաղաքում պատվաստվել է 1200-ից ավելի մարդ, որի մեծ մասը պետական համակարգի աշխատողներ են։
Սույն հոդվածը հրապարակվել է ԵՄ ֆինանսական աջակցությամբ: Հոդվածը արտացոլում է հեղինակի կարծիքը և պարտադիր չէ, որ արտացոլի ԵՄ տեսակետը։
