Այս կարգախոսով է Քաղաքացիական պայմանագիր կուսակցությունը մասնակցելու հոկտեմբերի 17-ին Գորիս համայնքում համամասնական ընտրակարգով կայանալիք ավագանու ընտրություններին։ Քարոզարշավի մեկնարկից մինչև այժմ կուսակցությունը հանդիպումներ է անցկացնում տարբեր բնակավայրերում, ներկայացնում նախընտրական ծրագիրը, որտեղ ներկայացված է համայնքի անվտանգությանը, տնտեսության զարգացմանը, քաղաքաշինությանը, հանրային տրանսպորտին, մշակույթին, սպորտին, երիտասարդությանը, կառավարման բարելավմանը և մարդկային կապիտալի զարգացմանն առնչվող դրույթներ։
Քաղաքացիական պայմանագիր կուսակցության՝ Գորիսի ավագանու անդամի հավակնորդների ծրագրում առանձին շեշտադրված է նաև զբոսաշրջության, գյուղատնտեսության, Սփյուռքի հետ համագործակցության նոր ձևաչափեր ներդնելու, Արցախից տեղահանված քաղաքացիների սոցիալական ապահովության նախագծերի իրականացման, սահմանամերձ բնակավայրերում ժողովրդագրական խնդիրների լուծման, մասնավորապես, վերաբնակեցման, ինչպես նաև բնակչության շրջանում քաղպաշտպանության, ռազմագիտության և մարտավարական գիտելիքների ուսուցման հետ կապված հարցեր։
Նախընտրական ծրագրում առանձին ուղերձով ընտրողներին է դիմում կուսակցության ցուցակը գլխավորող թեկնածուն՝ Վլադիմիր Աբունցը։ Ուղերձում, մասնավորապես, նշվում է․ որ իր և թիմի աշխատանքը միտված է լինելու «քաղաքական ամեն տեսակ պառակտումների վերացմանը, հակամարտ կողմերի հաշտեցմանը, բոլորի ներուժը միավորելուն և համայնքի շենացմանը ծառայեցնելուն»։ Ըստ թեկնածուի, համերաշխությունը կենսական նշանակություն ունի համայնքի հզորացման գործում։
