Հանրային տրանսպորտի հարցն օրակարգային է

Հայաստանում վարչատարածքային փոփոխությունների ադյունքում Սյունիքում ձևավորվել է ութ բազմաբնակավայր համայնք։ Ակնկալվում էր, որ տնտեսական զարգացման հնարավորության, հանրային ծառայությունների մատչելիության հետ միասին նաև հաղորդակցության միջոցների հասանելիություն կապահովվի։ Անցել է բավական ժամանակ, սակայն վերջինիս հետ կապված խնդիրները դեռևս չեն լուծվում։ Մարզի համայնքների միջև երթուղային ցանցն ամբողջացված չէ․ ուղևորափոխադրումների հարցը շարունակում է օրակարգում մնալ։ Հայտարարված երթուղիների համար մրցույթները չեն կայանում, քանի որ գործող սակագների պայմաններում արտոնագիր ունեցող տրանսպորտային ընկերությունները վնասով են աշխատում։ Եվ մինչ նրանք ակնկալում են, որ պետությունը մասնակի կփոխհատուցի իրենց՝ ուղևորափոխադրումների կազմակերպման համար, քաղաքացիները երթևեկում են տաքսիներով։ Գորիս, Տեղ, Տաթև համայնքների բնակիչներն իրենց արտադրած գյուղմթերքը իրացնում են Գորիսի շուկայում։ Քաղաք հասնելու համար մարդիկ հիմնականում օգտվում են տաքսի փոխադրամիջոցներից, որովհետև հանրային տրանսպորտը կանոնավոր չի աշխատում։ Խորհրդային տարիներից հետո դադարել են գործել մինչհամայնքային տարբեր երթուղիներ, և գյուղմթերքը շուկա հասցնելու համար ստիպված են տաքսի ծառայությունից օգտվել։ Տարիների ընթացքում բնակիչներն արդեն հարմարվել են տաքսի ծառայություններից օգտվելուն, քանի որ շատերի կարծիքով վստահ չեն, որ դրանք կանոնավոր կգործեն, մյուս կողմից՝ նախընտրում են առավել հարմարավետ տեղափոխության տարբերակ։ Ըստ քաղաքացիների, մի քանի հոգով միավորվում են, վճարում միասին։ Տրանսպորտային ծառայությունների ապահովումը խնդիր է հատկապես խոշորացված համայնքի կազմում գտնվող բնակավայրերի միջև հաղորդակցության ապահովման առումով, քանի որ համայնքային իշխանության նստավայր հասնելու համար բնակիչն առանձին տաքսի է վարձակալում։ Գորիս, Տեղ, Տաթև համայնքների 24 բնակավայրերից հանրային տրանսպորտ գործում է միայն Քարահունջ, Վերիշեն Խնձորեսկ գյուղերում։ Մնացած բնակավայրերում, ըստ պաշտոնական աղբյուրների, տրանսպորտային ծառայություն իրականացնելու համար հայտարարված մրցույթները չեն կայանում, քանի որ դրանք հիմնականում վնասով են աշխատում։