Գորիսի Վաղարշ Վաղարշյանի անվան դրամատիկական թատրոնը շուտով հանդիսատեսին կներկայացնի «Քաղցած է, կատաղած ու շատ վտանգավոր» մանկական ներկայացումը՝ բեմադրող ռեժիսոր Իշխան Ղարիբյան։
Ներկայացումը ստեղծվել է Յ․Ստելմախի պիեսի հիման վրա։ Սյուժեն հետաքրքիր է, գունեղ, զվարճալի, նաև՝ընկալելի երեխաների համար։ Հանդիսատեսը հնարավորություն կունենա տեղափոխվել շոգ Աֆրիկա և ականատես լինել այնտեղ ապրող կենդանիների արկածներին։
«Ներկայացումը հեքիաթ է՝ ուրախ, երաժշտական և ամենակարևորը, ինչպես յուրաքանչյուր մանկական ներկայացման մեջ, բարին հաղթում է չարին՝ բարի ավարտով»,–նշում է բեմադրիչը։ Ղարիբյանը համոզված է, որ ներկայացումն անգամ կընկալեն 3-4 տարեկան երեխաները, և փոքրիկ հանդիսատեսից յուրաքանչյուրը կվերցնի այն, ինչ ինքը կհասկանա։ «Կարևոր է նաև այն, որ երեխաները մեկ ժամ կկտրվեն առօրյա միօրինակությունից, հեռախոսներից, պլանշետներից․ կնստեն դահլիճում և կուրախանան, մի օր կապրեն այդ հեքիաթով»։
Ներկայացման մեջ ներգրավված է երիտասարդ դերասանների հիմնական, գործող կազմը։ «Առաջին անգամ Գորիսի պետական դրամատիկական թատրոնում մի քանի տարի առաջ եմ պատիվ ունեցել բեմադրություն անելու, դերասաններից ոմանց գիտեի այդ ներկայացումից, և «ինտուիցիայիս» վստահելով՝ կարծում եմ, որ մյուս դերասանների հարցում էլ չսխալվեցի»,–ասում է բեմադրողը և հավելում, –«սիրում եմ աշխատել երիտասարդների հետ, որովհետև փոխադարձաբար միմյանցից սովորում ենք»։ Իշխան Ղարիբյանը, ով Երևանի Պատանի հանդիսատեսի թատրոնի դերասան է ու նաև Կապանի Ալ․Շիրվանզադեի անվան դրամատիկական թատրոնի գեղարվեստական ղեկավար, կարևորում է նաև ներկայացման մեջ ընդգրկված դերասանական կազմի մասնագիտական նվիրվածությունը, ինչպես նաև համատեղ աշխատելու մեծ ցանկությունն ու ստեղծագործական մոտեցումը, որն էլ ըստ նրա՝ «ուղղակի դրախտ է ռեժիսորի համար»։ Ռեժիսորը համոզված է, որ ներկայացումը մի մի քանի անգամ խաղալուց հետո ավելի կբացվի և «միս ու արյուն կստանա»։
Գորիսի Վ․Վաղարշյանի անվան պետական դրամատիկական թատրոնի տնօրեն, ՀՀ վաստակավոր արտիստ Շանթ Հովհաննիսյանը կարծում է, որ վերջին տարիների իրադարձություններից՝(պատերազմ, համավարակ), քաղաքում, առհասարակ նաև մշակութային դաշտում, մի տեսակ տրամադրության անկում կա, որն անդրադառնում է նաև թատրոնի, հանդիսատեսի հոսքի վրա, սակայն, որքան էլ որ դժվար է, դա չի հուսահատեցնում իրենց, շարունակում են աշխատել, ստեղծագործել և հանդիսատեսին ոգևորել նոր ներկայացումներով։
«Մի քանի օրից կկայանա «Քաղցած է, կատաղած ու շատ վտանգավոր» մանկական ներկայացման առաջնախաղը ,ու ցանկալի է, որ մեր ծնողներն, անկախ իրենց տրամադրությունից, երեխաներին թատրոնից չկտրեն և անպայման մասնակից դարձնեն մշակութային կյանքին ու նաև էստեղից մի փոքր ջերմություն, ժպիտ տանեն, որպեսզի կյանքի անակնկալ փորձություններին ու դժվարություններին կարողանան քաջությամբ դիմակայել»,- ասում է թատրոնի տնօրենը։ Հովհաննիսյանի խոսքով՝ թատրոնին ոչինչ փոխարինել չի կարող՝ ո՛չ համացանցը, ո՛չ հեռուսատեսությունը․․․
«Թատրոնը կենդանի շփում է, հետաքրքիր գույներ, այն խոր և տպավորիչ մթնոլորտ է ստեղծում և ցանկացած երեխայի աշխարհայացքի ձևավորման, ընկալումների մեջ և մեծ հետք է թողնում»,-ասում է նա։
