Գորիսի համայնքապետարանում կայացավ համայնքի ավագանու չորրորդ նստաշրջանի հերթական նիստը, որը վարում էր Գորիս համայնքի ղեկավար Առուշ Առուշանյանը: Օրակարգում ընդգրկված ավագանու որոշման նախագծերը վերաբերում էին համայնքային ենթակայության հողատարածքների աճուրդի միջոցով օտարմանը, հողամասերի նպատակային նշանակության փոփոխության և այլն։ Համայնքի ղեկավարի առաջարկությամբ ավագանին որոշում կայացրեց Գորիս քաղաքի Վանքի տափ թաղամասի 10-րդ շենքի նկուղային հարկում 15 տարի բնակվող բազմանդամ ընտանիքին համայնքային սեփականության տարածք նվիրաբերելու մասին։
Քննարկվեց նաև Գորիս համայնքի ավագանու 2022թ. հունիսի 29-իթիվ 72-Ա որոշման թիվ 13 հավելվածում փոփոխություն կատարելու մասին` ըստ որի Համայնքային ենթակայության հիմնարկների աշխատակիցների թվաքանակը, հաստիքացուցակը և պաշտոնային դրույքաչափերը հաստատելու մասին թիվ 99-Ա որոշման մեջ կատարվել է փոփոխություն, մասնավորապես, Խնձորեսկ բնակավայրի թանգարանը համալրվեց գիտաշխատողի հաստիքով։
Ավագանու որոշմամբ հայրենիքի պաշտպանության ժամանակ զոհված, անհետ կորած անձանց, ծնողազուրկ, հինգ և ավել անչափահաս երեխա ունեցող ընտանիքների երեխաներն այսուհետ համայնքային ենթակայության նախադպրոցական և արտադպրոցական ուսումնական հաստատություններ կհաճախեն անվճար հիմունքներով։ Նույն նախագծի մեկ այլ կետով այսուհետ համայնքի ղեկավարի որոշմամբ հնարավոր կլինի առանձին դեպքերում 50% վարձավճարների զեղչ կիրառել նաև խոցելի այլ խմբերի երեխաների համար։
