Գորիսի հիդրոօդերևութաբանական կայանում Նազիկ Մաթևոսյանն աշխատում է արդեն քսանվեց տարի, սկզբում տեխնիկ էր, իսկ 2008թ-ին նշանակվել է կայանի պետ: Ավարտել է Երևանի պոլիտեխնիկական համալսարանի կիբեռնետիկայի բաժինը։ Օրական ութ անգամ՝ երեք ժամը մեկ դիտարկումներ է իրականացնում ըստ սահմանված հերթականության. օդի և հողի մակերևույթի ջերմաստիճանի, ամպամածության, հորիզոնական տեսանելիության, խոնավության, քամու ուղղության և արագության, տեղումների քանակի, ճնշման, մթնոլորտային, երևույթների, արևափայլի, հողի 5սմ և 10 սմ խորությունների ջերմաստիճանների, ձյան ծածկի բարձրության վերաբերյալ։ Նաև դիտարկումներ են կատարվում վտանգավոր քամու, ամպրոպի, մառախուղի, կարկուտի մասին և տվյալները հաղորդվում են ազգային ծառայություն։
«Տեղումների համար ունենք հատուկ տեղումնաչափի ապակյա անոթ, որով չափում ենք, թե քանի մմ տեղում է եկել, մենք կանխատեսումներ չենք կատարում, տվյալները լրացնում ենք օդերևութաբանական հատուկ գրքույկներում, ուղարկում գլխավոր կենտրոն, և այդ տվյալներն օգտագործվում են կանխատեսումների համար»-, ասում է կայանի պետը:
2023 թվականից Գորիսի կայանում տեղադրվել է ավտոմատ օդերևութաբանական կայան (ԱՕԿ), որը տրամադրվել է Ճապոնիայի կառավարության կողմից ֆինանսավորվող և ՄԱԿ-ի «Զարգացման ծրագրի կողմից իրականացվող աջակցություն Հայաստանում կլիմայական ռիսկերի դիմակայությանն ուղղված ազգային ներդրումներին» ծրագրի շրջանականերում:
ՀՀ ՇՄՆ Հայհիդրոմետ ՊՈԱԿ օդերևութաբանության ծառայության պետ Սոնա Հայրապետյանը ասում է, որ Գորիսի կայանում առաջիկայում կտեղադրվեն ձյան ծածկի բարձրությունը չափող սարքը և հողախորքային ջերմաչափերը, որոնք հնարավորություն կտան ստանալ դիտարկվող տվյալները և կատարել դրանց վիճակագրական բնութագրերի վերլուծությունը աղյուսակային և գրաֆիկական տեսքով։
Այս ամենի հետ մեկտեղ Գորիսի օդերևութաբանական կայանի պետ Նազիկ Մաթևոսյանը մտահոգությամբ է խոսում կայանի շենքի հին ու չվերանորոգված լինելու մասին.
«Գույքը շատ հին է, մի քանի անգամ մենք մեր ուժերով վերանորոգել ենք, գլխավոր կենտրոնից ասում են, որ ձեր կայանը շատ լավ վիճակում է, կայաններ կան, որտեղ անգամ աթոռ չկա նստելու»,-ասաց նա։ Նա նաև նշում է, որ որոշ սարքավորումներ կամ հին են կամ չեն աշխատում։
«80-ականներից չի աշխատում Իվո գործիքը որով որոշում ենք ամպերի բարձրությունը, տեսակները, դիմել ենք Հիդրոօդերևութաբանության և մոնիթորինգի կենտրոն, պատասխանել են, թե ոչինչ, աչքաչափով նայեցեք»:
