Անահիտ Բաղդասարյան
Հայ Ավետարանական եկեղեցին «Կամրջակ» սոցիալ-բարեգործական հասարակական կազմակերպության հետ միասին վերջին հինգ ամիսներին Սյունիքի մարզի Գորիս, Սիսիան եւ Կապան տարածաշրջաններում օգնել է ավելի քան 150 սոցիալապես անապահով ընտանիքի: «Կամրջակը» 15 մլն դրամի չափով սննդամթերք է տրամադրել, իսկ Հայաստանյաց Ավետարանական կենտրոնը կազմակերպել է նվիրատվության տեղափոխումը: Այդ գործում կարեւոր դերակատարություն են ունեցել կենտրոնի երիտասարդ կամավորները: «Ամբողջ սննդամթերքը կշռել, փաթեթավորել, տեղափոխել են մեր կամավորները»,- նշում է Հայ Ավետարանական եկեղեցու Գորիս համայնքի ներկայացուցիչ Սարգիս Օչինյանը:
Ս. Օչինյանի կամ ինչպես գորիսեցիներն են նրան անվանում՝ Սարգիս Եղբոր խոսքով այս ծրագիրն սկսվեց ձմռանը, քանի որ այդ շրջանում մարդիկ առաջնահերթ ցանկանում են լուծել ջեռուցման հարցը եւ չեն կարողանում լիարժեք սնվել: «Մարդիկ, իրենց սննդակարգի խնայողության հաշվին ստիպված վճարում են կոմունալ վարձերը, որը, հատկապես, երեխաների թերսնման պատճառ է դառնում»,- ավելացնում է Սարգիս Եղբայրը:
Նա նաեւ նշում է, որ այս ծրագրից օգտվելու համար կարող էր դիմել սոցիալապես անապահով վիճակում գտնվող ցանկացած ընտանիք: Նրանց դիմումները հետո մերժվում կամ հաստատվում էին սոցաշխատողների տնայցերի միջոցով: Յուրաքանչյուր ընտանիքի գոնե մեկ, իսկ ոմանց արդեն մինչեւ երեք անգամ տրամադրվել է այդ փաթեթներից: Բացի այդ, ձմռանը հոլանդացի մի ընտանիքի աջակցությամբ Գորիսում 3 ընտանիք մեկական խ/մ փայտ, եւս 15 հոգի էլեկտրական սավաններ եւ 10 ընտանիք սննդի փաթեթներ են ստացել:
Հիշեցնենք, որ Հայաստանյանց Ավետարանական կենտրոնը Գորիսում իր գործունեությունն սկսել է դեռեւս 1997թ·-ի հոկտեմբերից: Հայաստանյաց Ավետարանական կենտրոնին զուգահեռ, 1997թ.-ից սկսած, Սյունիքում սկսեց բարեսիրական ծրագրեր իրականացնել նաեւ Հայ Ավետարանչական ընկերակցությունը, որի ներկայացուցիչը դարձավ հենց Սարգիս Օչինյանը:
Հիշյալ կրոնական կազմակերպությունը «Կամրջակ» սոցիալ-բարեգործական հասարակական կազմակերպության հետ համագործակցելով երեք տարվա ընթացքում աջակցել են Սյունիքի ավելի քան 200 ընտանիքի: «Հույս ունեմ այս համագործակցությունը կշարունակվի, քանի որ սա ոչ միայն օգնություն է, այլեւ օրհնություն: Այս օգնությունն ուժ է տալիս հույսը չկորցնելու ու շարունակելու ապրել»,- նշում է Ս. Օչինյանը:
Սարգիս Եղբայրը ավելացրեց, որ իր համար կարեւոր է մարդկանց չսովորեցնել օգնությամբ ապրելուն, իսկ մարդիկ էլ կարողանան շնորհակալ լինել եւ աջակցությունը դիտարկեն ոչ թե իրենց վիճակի պատասխան, այլ՝ որպես սիրո եւ ուշադրության դրսեւորում:
