Անահիտ Բաղդասարյան
65-ամյա Լեռնիկ Թոխունցը միայն ընտրության օրն է իմացել, որ համայնքի ղեկավարի ընտրություններ են. «Ինչ պիտի փոխվի, ուղղակի որպես պարտականություն գնում մասնակցում եմ»: Այս ընտրություններից էլ որևէ ակնկալիք չունի. «Սուրենի ձեռքին ինչ կա, որ ինչ տա», -ավելացրեց նա: Եսթեր Ավանեսյանի խոսքով՝ գյուղում փոփոխությունը գյուղապետից չի կախված, մեծերից ա կախված»: Որոտան համայնքում խնդիրները շատ են, բայց բնակիչների կարծիքով՝ համայնքի ղեկավարի ջանքերով շատ բան չի կարող փոխվել, կառավարությունը պիտի աջակցի և լուծի համայնքի խնդիրները:«Մինչև երկրի ղեկավարը չփոխվի, ոչ մի բան էլ չի փոխվի: Սա ավան ա, որ մի գործարան չկա, ստեղ ի՞նչ աճ պիտի լինի, անասուն պահելու տարածք էլ չունենք»,- դժգոհում է Քաջիկ Խաչատրյանը:
Բնակիչները համայնքի հրատապ խնդիրներից առանձնացնում են ճանապարհների, կոյուղու ցանցի անմխիթար վիճակը, գազի, շուրջօրյա խմելու ջրի բացակայությունը: «Կոյուղու ջրերը լցված են շենքի բակերը: Երեխաները ուզում են խաղան, բայց հնարավոր չէ, ամբողջ օրը ցեխ ա»,- ասում է Աննա Մարգարյանը:
85-ամյա Արամայիս Մկրտչյանն ուղղակի չի ուզում խոսել այդ խնդիրների մասին. «Ասեմ էլ ոչ մի բան օգուտ չի տալու. հուվ հունց կարում ա, նենց էլ յոլայա քում»,- նշում է նա ու ավելացնում, որ «գյուղի տներից շատը դատարկ ա»:
Եվ չնայած մարդիկ խոսում են իրենց գյուղը լքողների մասին, բայց Որոտան համայնքի գործող գյուղապետն ուրախությամբ է նշում, որ համայնքում ծնելիությունն ավելացել է: «Նախկինում գյուղում միայն ծերեր էին, այժմ բնակչության 90%-ը ջահելներ են՝ մինչև 18 տարեկան 129 հոգի»:
Թե ինչպես է խթանվում ծնելիության մակարդակի բարձրացումը, արդյոք որևէ սոցիալական օգնություն է ցուցաբերում նորաստեղծ ընտանիքներին, Ս. Օհանջանյանն ասաց, որ ներկայումս որպես օգնություն միայն նպաստն է: «Համայնքը գործում է դոտացիայի հաշվին, հարկեր-մարկեր չենք հավաքում, սեփական եկամուտներ չունենք, որ օգնություն տանք»,-պատասխանեց համայնքի ղեկավարի թեկնածուն: Իսկ թե ինչու է խուսափում հարկերի հավաքագրումից, տեղական բյուջե գումարներ մուտք անելուց, ավելացրեց. «Երբ ինչ-որ ներդրման կարիք ա լինում, ժողովուրդն ինձ ավելի շատ ա օգնում ֆիզիկապես, քան էն հարյուր հազար դրամ գույքահարկը, որ ես պիտի վերցնեմ ժողովրդից»:
Միգուցե հենց այդ «բարեգործությունների» հաշվին է, որ 2007-ից մինչ այսօր, չնայած Որոտանում համայնքային խնդիրները կուտակվում են, Սուրեն Օհանջանյանը Որոտան համայնքի ղեկավարն է, և դա, ըստ նրա, «ժողովրդի ցանկությունն է»:
hetq.am
