Անահիտ Բաղդասարյան
Հալիձոր համայնքում շարունակվում է համայնքների խոշորացման հանրաքվեն: Իր ընտրությունը կատարեց նաև համայնքի ղեկավար Մարատ Գերասիմյանը: «Կողմ եմ քվեարկել, քանի որ դրական եմ տրամադրված այս գործընթացին; Ես համարում եմ, որ սա շատ լուրջ, կարևոր և արդյունավետ թռիչք կլինի մեզ համար»,-նշեց նա:
Թե ինչպես է վերաբերում այն հանգամանքին, որ այլևս համայնքի ղեկավար չի լինի, Մ. Գերասիմյանը պատասխանեց. «Թող համայնքս զարգանա, նոր ենթակառուցվածքներ ավելանան, իմ երեխաները ավելի բարեկեցիկ կյանքով ապրեն, բայց ես գյուղապետ չլինեմ»:Թե ինչով կզբաղվի Հալիձոր համայնքի ղեկավարը պաշտոնը կորցնելուց հետո, վերջինս դժվարացավ պատասխանել, իսկ թե արդյոք հրարավոր է, որ առաջադրվի որպես Տաթև համայնքի ղեկավարի թեկնածու, ասաց, որ «այդ մասին չի մտածել. ժամանակը ցույց կտա»:
Մ. Գերասիմյանը կարծում է, որ համայնքների խոշորացումից հետո, Տաթև համայնքի առաջին քայլը պիտի լինի յուրաքանչյուր բնակավայրի խնդիրների վերհանումն ու վերլուծությունը և հետո այդ խնդիրների լուծման ուղղված քայլերի մշակումը:
Թե ինչպիսին է բնակիչների տրամադրվածությունը, համայնքի ղեկավարը կարծում է, որ «ով հասկացել է այս գործընթացի նպատակը, միանշանակ կողմ քվեարկի»:
37/1 ընտրատարածք է այցելել նաև թիվ 37 ընտրատեղամասի նախագահ Արմեն Ստեփանյանը, ով կարծում է, որ «եթե գյուղապետերը նորմալ աշխատանք են տարել, այսինքն մասրդկանց բացատրել են, թե սա ինչ գործընթաց է, ներկայացրել են խոշորացման դրական և բացասական կողմերը, ինձ թվում ա՝ այո կասեն»:
Թե ինչու են համայնքի բնակիչները պասիվ քվեարկության հարցում, Ա. Ստեփանյանը պատասխանեց. «Պասիվություն նկատվում է. դա էլ կապված է նրանից, որ թեկնածուներ չկան, շահագրգիռ կողմեր չկան»:
Ժամը 16:00-ի դրությամբ 443 ընտրողներից հանրաքվերին մասնակցել են 147-ը: Ընտրախախտումներ չեն գրանցվել:
hetq.am
