Շուշան Օհանյան
Այսօր՝ դեկտեմբերի 6-ին տեղի է ունենում Հայաստանի նորանկախ պատմության մեջ սահմանադրության երրորդ հանրաքվեն:
Սյունիքի մարզի Շինուհայր համայնքում ընտրական իրավունք ունեցողները չեն շտապում մասնակցել Սահմանադրական բարեփոխումների հանրաքվեին:
Ժամը 17:00-ի դրությամբ Շինուհայրում հանրաքվեին մասնակցել է 793 բնակիչ, որը կազմում է ընտրողների մոտ 45%-ը:
Թիվ 37/31 ընտրատեղամասի նախագահ, ԲՀԿ կուսակցության ներկայացուցիչ Արա Մկրտչյանի խոսքով՝ ընտրություններն անցնում են խաղաղ պայմաններում, մինչ այս պահը որևէ միջադեպ չի եղել: Ընտրատեղամասում դիտորդներ չկան:«Կոնկրետ մեր համայնքում մարդիկ ավելի շատ «այո»-ի կողմնակից են»,-gorispress.am-ի հետ զրույցում նշեց Շինուհայր համայնքի ղեկավար Սմբատ Երեմյանը:
Մեր այն հարցին, թե արդյոք բնակչությունը բավականաչափ իրազեկ է, թե Սահմանադրական փոփոխությունները հատկապես որ ոլորտներին են ուղղված, համայնքի ղեկավարի պատասխանը դրական էր:
Համայնքի ղեկավարը կարծում է, որ անցումը կիսանախագահական համակարգից կառավարման խորհրդարանական համակարգի, հիմնական գործոնն է, որի համար բնակիչները ավելի շատ հակված են դեպի «այո»-ն: Ս. Երեմյանը կարևորում է նաև այն հանգամանքը, որ նոր սահմանադրությամբ կմեծանա ավագանու դերը:
Իսկ ահա 73-ամյա Թառլան տատը տեղյակ չէ, թե ինչ է փոխվելու սահմանադրական բարեփոխումներով:
«25 տարի ա բարեփոխում են, բայց մենք էլի նույն փոսում ենք: Ես լավ ապրալ եմ է, համ լավն եմ տեսալ, համ փիսը, դարդս տուք եք, ես ծեր սերնդին եմ խղճում: Էն վախտ կռեվա իլալ, սով, բայց մի կարևոր պան կար, սաղս հավասար էինք»,-ասում է Թառլան տատը:
Խոսակցությանը միացավ Ռոզա տատը. «Չիմ ասում են այո, ես էլ եմ ասալ, բայց ոչ մի պան էլ գուդում չեմ: Մինակ ես չեմ է, մարդիկ անտեղյակ են, ուղղակի բնազդաբար ընտրում են»:
