Քրիստինե Հայրապետյան
Գորիսի քաղաքապետարանում տեղի ունեցավ` ներքաղաքային տրանսպորտային երթուղիների և դրանց աշխատանքի հետ կապված հանրային քննարկում: Քննարկմանը մասնակցում էին նաև երթուղիները սպասարկող «Լաստ» և «Սամուել տրանս» ընկերությունների տնօրենները:
Քաղաքապետ Վաչագան Ադունցն անդրադառնալով ներքաղաքային ուղևորափոխադրումների կազմակերպման խնդրին, իր մտահոգությունն արտահայտեց, որ չնայած բնակիչների շրջանում պարբերաբար դժգոհություններ են հնչում տրանսպորտային ծառայության մատուցման վատ որակի մասին, սակայն խնդրի շուրջ կազմակերպվող քննարկմանը, երկխոսությանը պասիվ են մասնակցում: Նրա խոսքով զարմանալի է, որ ուսանողները, ովքեր ավելի հաճախ են դժգոհում, չեն մասնակցում հրավիրված քննարկմանը: Դժգոհությունները, որոնք հիմնականում վերաբերում են ներքաղաքային տրանսպորտի ապահովման ժամանակացույցին, հիմնականում արտահայտվում են համացանցում, և հեղինակները մասամբ երիտասարդներն են, խուսափում են կենդանի երկխոսությունից, սպաարկող կազմակերպությունների հետ առերես քննարկման հնարավորությունից:«Լաստ» ՍՊԸ տնօրեն Սերյոժա Արզումանյանն, արձագանքելով բնակչության դժգոհություններին, նշում է, որ շուտով այդ խնդիրը կլուծվի, քանի որ երկրորդ մեքենայի անհրաժեշտություն կա: Նա նաև տեղեկացնում է, որ երկրորդ պահեստային մեքենան երթուղի կմտցնի առաջիկա տասը օրվա ընթացքում` տեխնիկական խնդիրների լուծումից հետո: Նրա խոսքով, եթե հարմար կլինի, կսկի աշխատել նույն երթուղին սպասարկող երկրորդ ավտոբուսը, որպեսզի բնակիչների կողմից դժգոհություններ չլինեն:
Սերյոժա Արզումանյանն առաջարկում է նոր տեղադրված կանգառներում տեղեկատվություն տարածել երթուղիների ժամային գրաֆիկների մասին: Համայնքի ղեկավարը ևս կարևորում է այդ հարցը, միաժամանակ շեշտելով, որ դրանից հետո որպես քաղաքապետարանը հետևողական է լինելու, և ներքաղաքային տրանսպորտի ոչ բավարար սպասարկման դեպքում օրենքով սահմանված կարգով վարչական տույժեր են կիրառվելու:
