Անահիտ Բաղդասարյան
Այսօր` փետրվարի 14-ին Սյունիքի մարզի Տաթև համայնքի միավորված 8 գյուղերում տեղական ինքնակառավարման մարմինների ընտրություններ են: Տաթև համայնքի ղեկավարի պաշտոնի համար առաջադրվել է 3 թեկնածու՝ անկուսակցականներ Իգոր Աբրահամյանը, Վարշամ Բագրատյանը եւ ՀՀԿ անդամ, Տաթեւ համայնքի նախկին ղեկավար Մուրադ Սիմոնյանը: Վերջինիս թեկնածությունն առաջադրել է Հանրապետական կուսակցությունը: Թեկնածուի խոսքով՝ իր թեկնածությունը պաշտպանում են նաև նախկին 7 խոշորացված համայնքների ղեկավարները:
Խոտ համայնքի նախկին ղեկավար Մարտիրոս Գրիգորյանը gorispress.am- ին ասաց, որ քվեարկել է Մուրադ Սիմոնյանի օգտին: «Իմ գործընկերոջ օգտին եմ քվեարկել: Մենք բոլորս նրան ենք պաշտպանում, քանի որ 3 թեկնածուներից ինքն է փորձառու, ծանոթ է ՏԻՄ ոլորտի գործառույթներին, իրականացվող բարեփոխումներին: Այնպես չէ, որ մեր հնարավորությունները նրանից ցածր ենք դասել, բայց որոշում է կայացվել, մենք էլ պաշտպանում ենք»,-նշում է նա:
Հարժիս համայնքի ղեկավար Սուրեն Հարությունյանը ևս արդեն կատարել է իր քաղաքացիական պարտքը. «Ընտրել եմ արժանավորին, բայց մինչև ընտրությունները չավարտվի չեմ ասի, թե ում եմ ձայն տվել»:
Սվարանց համայնքի նախկին ղեկավար Արթուր Մարգարյանի կարծիքով քանի որ կենտրոնը Շինուհայրն է լինելու, արդարացի է, որ գոնե գյուղապետն ուրիշ համայնքից է առաջադրվել:
Քաշունի համայնքի նախկին ղեկավար Գառնիկ Հակոբյանը գնահատում է Տաթևի նախկին համայնքի ղեկավարի կարողությունները, սակայն չի նշում, թե ում օգտին է քվեարկել:
Թե ինչու է 8 համայնքի ղեկավարներից հենց Տաթև համայնքի ղեկավարի թեկնածությունը առաջադրվել, Տանձատափ համայնքի նախկին ղեկավար Ռոբերտ Մուշեղյանի կարծիքով «Մուրադ Սիմոնյանի կատարած աշխատանքը անհամեմատ ավելի բարձր դիրքերում է, քան մյուս համայնքների ղեկավարներինը»:
Հալիձոր համայնքի նախկին ղեկավար Մարատ Գերասիմյանն ղեկավարն ասում է, որ իրենց տեղամասում առաջին քվեարկողն է եղել և իր քվեն տվել է Մ. Սիմոնյանի օգտին: «Նրա առաջադրումը կարևորում եմ նրանով, որ արդեն 9 տարվա համայնքի ղեկավար է ու իր համայնքում բազմաթիվ գործեր է արել: Մի քիչ կոպիտ կարող է հնչել, բայց ինքը «քնած մարդ չի» և մեզ պետք են նման մարդիկ, ովքեր կկարողանան նոր շփումների միջոցով նոր ծրագրեր իրականացնել համայնքում»:
Շինուհայր համայնքի նախկին ղեկավար Սմբատ Երեմյանը ժամը 15:30-ի դրությամբ քվեարկությանը դեռ չէր մասնակցել: Թե ում օգտին կքվեարկի, գաղտնի պահեց, բայց այն հարցին, թե ճիշտ էր արդյոք Մ. Սիմոնյանի առաջադրումը, կարճ, պատասխանեց. «Այո»:
