Շուշան Օհանյան
Այսօր Սյունիքի մարզի Տաթև, Լոռու մարզի Թումանյան և Տավուշի մարզի Դիլիջան համայնքներում տեղական ինքնակառավարման մարմինների` համայնքի ղեկավարի և ավագանու ընտրություններ են:
Տաթևի խոշորացած համայնքի կազմում գտնվող Խոտի թիվ 37/3 ընտրատեղամասում 652 ընտրողներից ժամը 18:00-ի դրությամբ քվեարկել են 367-ը (56,2 %-ը):
Թիվ 37/3 ընտրատեղամասի քարտուղար Սեյրան Հովհաննիսյանի խոսքով՝ ընտրություններն անցնում են խաղաղ պայմաններում և մինչ այժմ որևէ խախտում չի արձանագրվել: Նույնը հաստատում է նաև համայնքի ղեկավարի թեկնածու Վարշամ Բագրատյանի վստահված անձ Վիտալի Բագրատյանը:
Խոտ համայնքի նախկին ղեկավար Մարտիրոս Գրիգորյանը, ով գտնում է, որ մեր համայնքներն իրենց ենթակառուցվածքներով, փոքր և մեծ խնդիրներով, դեռևս խոշորացմանը պատրաստ չէին, արդեն կատարել է իր քաղաքացիական պարտքը:
Մ. Գրիգորյանը ՏԻՄ ընտրության մասնակցայնության ցուցանիշնը դրական է համարում. «Եթե համեմատելու լինենք նախկին ընտրությունների հետ, ապա մարդիկ այս անգամ ավելի հետաքրքրված են»:
Այն հարցին, թե ինչու համայնքի նախկին ղեկավարներից թեկնածությունն առաջադրեց Տաթև համայնքի նախկին ղեկավար Մուրադ Սիմոնյանը, նա պատասխանում է. «Մեզանից մեկը պետք է առաջադրվեր, ու քանի որ առաջինը Տաթև համայնքի նախկին ղեկավարն էր, իսկ մենք բոլորս մի թիմ ենք՝ նույն կուսակցության ներկայացուցիչներ, առարկելն իմաստ չուներ: Ի վերջո, բնական է, որ ընտրվելու է մեկը: Այս ամենը գիտակցելով հանդերձ, ես իմ թե’ ընտրվելու, թե’ հետագայում աշխատելու հնարավորությունները ոչ մեկից ցածր չի գնահատում»:
Իսկ ընտրություններից հետո կշարունակի արդյոք աշխատել ՏԻՄ ոլորտում, թե` ոչ, Մարտիրոս Գրիգորյանը դեռ չի որոշել:
