Աննա Սահակյան
Տեղի համայնքապետարանի նիստերի դահլիճում տեղի ունեցավ համայնքի 2020 թվականի բյուջեի նախագծի հանրային քննարկում: Համայնքի ղեկավար Ներսես Շադունցը անդրադարձ կատարեց 2019 թվականի ընթացքում իրականացված ծրագրերին, այնուհետև ներկայացրեց 2020 թվականի ծրագրային բյուջեի նախագիծը:
Համայնքի 2020թ.-ի բյուջեն մշակվել է՝ հիմք ունենալով համայնքի 2017-2021թթ. հնգամյա զարգացման ծրագիրը և 2020 թվականի տարեկան աշխատանքային պլանը: Գալիք բյուջետային տարվա ընթացքում համայնքի զարգացման հիմքում լինելու են բնակիչների կենսական շահերի ապահովումը, շրջակա միջավայրի պահպանումը, համայնքի հարմարավետ և բարեկեցիկ միջավայրի ստեղծումը, համայնքային ենթակառուցվածքների արդիականացումն ու զարգացումը, ինչպես նաև համայնքի գլխավոր հատակագծին համապատասխան քաղաքաշինական ծրագրերի իրականացումը: Նշված ուղղություններից, համայնքի ղեկավարն առանձնացրեց համայնքի մշակութային, մարզական և հասարակական կյանքի աշխուժացման անհրաժեշտությունը և այս ուղղությամբ ֆինանսական միջոցների ներդրումը։ Ներսես Շադունցը նշեց, որ քննարկվել է «Գորիսի մամուլի ակումբ» հասարակական կազմակերպության առաջարկը գալիք 2020 թվականի բյուջեի նախագծով եկամուտների 0,26%-ը ՝ հինգ հարյուր հազար դրամ նախատեսել մասնակցային բյուջետավորման համար, և արդեն իսկ նախնական համաձայնություն են հայտնել։ Համայնքի ղեկավարի խոսքով այն հնարավորություն կտա համայնքի բնակիչներին մասնակցել հանրային ռեսուրսների բաշխմանը, լսելի դարձնել նրանց ձայնը որոշումների կայացման ժամանակ:
Հանրային լսման ժամանակ բնակիչների կողմից բարձրաձայնվեցին համայնքում աղբամանների տեղադրման, Խնածախի խմելու ջրի ապահովման, բնակավայրերի մանկապարտեզների վերաբերյալ հարցեր: Իսկ սոցիալական օգնության համար նախատեսված գումարներն առաջարկվեց փոխարինել սոցիալական նախաձեռնություններով, ինչպես, օրինակ, առանձին դեպքերում անհատույց գյուղատնտեսական կենդանիների տրամադրումը կամ այլ ձևաչափով։ Այս հարցի շուրջ քննարկումները կշարունակվեն մինչև ավագանու կողմից բյուջեի հաստատումը:
