Ինչպես արդեն մամուլում գրվել է, երեկվանից Գորայք համայնքի արտագնա արոտների տարածքում անհետ կորել է Գորիս համայքի Ներքին Խնձորեկ բնակավայրի բնակիչ Ն․Ս-ն։ Խնձորեսկ բնակավայրի վարչական ներկայացուցիչ Երվանդ Մալունցը mediapoint.am-ին պատմեց, որ առավոտյան ժամը 10-ին Նարեկը անասուններին քշել է դեպի արոտներ։ Վերջին անգամ նրանից տեղեկություն ստացվել է հեռախոսային հաղորդագրության միջոցով՝ կնոջ հեռախոսահամարին որպես բաց թողված զանգ։ Ավելի ուշ, նրա ընկերները տեղավորել են անասուններին, մտածելով, որ Ն-ը կվերադառնա։ Կեսգիշերին արդեն նրանք ահազանգել են հարազատներին և վարչական ներկայացուցչին։ Վերջինս այդ մասին իրազեկել է ոստիկանությանը և ԱԻ-ին, միաժամանակ խնձորեսկցի երիտասարդների հետ միասին մեկնել դեպքի վայր։
«Առայժմ միակ կասկածը սահմանն անգիտակցաբար հատելն է, որը, սակայն դեռևս հաստատված չէ, քանի որ չկա պաշտոնական պատասխան Ադրբեջանի կողմից» ,-ասաց Երվանդ Մալունցը։ Վերջինիս խոսքով նշված տարածքից երևում է ադրբեջանական պահակակետ, բայց ըստ նրա, հնարավոր է, որ երիտասարդն այն շփոթել է հայկական սահմանապահների հետ։
Վայրի կենդանիների զոհ դառնալու վարկածն, ըստ վարչական ղեկավարի, քիչ հավանական է, քանի որ որևէ հետք չի հայտնաբերվել։ Չի գտնվել նաև երիտասարդի ձին։
Երվանդ Մալունցի խոսքով այն տեղեկությունները, թե որոնողական աշխատանքները դադարել են, իրականությանը չեն համապատասխանում, ուղղակի դրա ձևաչափն է փոխվել։
Ն․ Ս․ երեսուն տարեկան է, երկու անչափահաս երեխաների հայր։
Սեփ․ լրատվություն
