Շուշան Օհանյան
«Արեգակ» ունիվերսալ վարկային կազմակերպության համար /ՈւՎԿ/ 2013թ. հատկանշական է. կազմակերպությունը նշում է իր գործունեության 15 ամյակը, որի շրջանակներում բազմաթիվ միջոցառումներ են պլանավորված ՀՀ մարզերում և Երևանում:
15 ամյակին նվիրված միջոցառումների շարքը մեկնարկեց Գորիսում:
«Արեգակ» ՈւՎԿ-ի Սյունիքի մարզային միավորի կառավարիչ Նարեկ Մնացականյանը, ողջունելով ներկաներին, ասաց. «Իր գործունեության ընթացքում «Արեգակ»-ը միշտ խթանել է լավագույն վարկառուներին, ինչպես նաև աջակցել վերջիններիս բարձր առաջադիմություն ունեցող ուսանողների կրթությանը: «Ուսանողների ուսման վճարների փոխհատուցման ծրագիը» դրա օրինակն է: Այսօր մենք այստեղ ենք, որպեսզի հանձնեք հավաստագրեր` 2013-2014 ուս. տարվա առաջին կիսամյակի համար կրթաթոշակներ ստացող ուսանողներին»:
Հավաստագրեր հանձնվեցին Սյունիքի, Վայոց Ձորի, ԼՂՀ 49 ուսանողների: Ուսանողներին հավաստագրերը հանձնեցին համապատասխան միավորների /Սյունիք, Վայոց Ձոր, ԼՂՀ/ կառավարիչները: ՀՀ-ում ավելի քան 1000 ուսանող արդեն օգտվել է այս կրթաթոշակից:
UMCOR Հայաստան մասնաճյուղի կողմից 2011թ.-ից իրականացվող «Ուսանողների ուսման վճարների փոխհատուցման ծրագրին» կարող են դիմել «Արեգակ»-ի վարկառուներ, որոնք ակտիվ են /վարկ ունեն/ ծրագրի դիմելու պահին, ունեն առնվազն մեկ տարվա վարկային պատմություն, ՀՀ և ԼՂՀ-ի պետական և մասնավոր բարձրագույն ուսումնական հաստատությունների ուսանողներ, նվազագույնը մեկ կիսամյակ ավարտած ուսանողներ:
Փոխհատուցվող կիսամյակի ուսման վճարը կազմում է առավելագույնը 100,000 ՀՀ դրամ: Ծրագիրը շարունակական է:
Ծրագրին դիմելու համար անհրաժեշտ է լրացնել և ներկայացնել դիմում, 3*4 նկար, ուսանողի անձնագրի պատճենը, ուսանողի ստուգման գրքույկի պատճենը /լրացված էջեր պարունակող/, տեղեկանք ընտանիքի անդամների կազմի վերաբերյալ, «Արեգակ»-ի վարկառուի անձնագրի պատճենը, եթե ընտանիքում կա հաշմանդամ, ապա հաշմանդամության գրքույկի պատճենը, եթե ուսանողը ծնողազուրկ է, համապատասխան փաստաթղթեր, եթե ընտանիքում կա վճարովի ուսումնական համակարգում սովորող մեկից ավելի ուսանող, ապա համապատասխան տեղեկատվությունը հավաստող փաստաթուղթ ուսումնական հաստատությունից:
Դիմումների ընդունման վերջնաժամկետներն են՝ ուսումնական առաջին կիսամյակի համար՝ հուլիսի 31-ը, իսկ ուսումնական երկրորդ կիսամյակի համար՝ հունվարի 31-ը:
