Ռազմական գործողությունները Ուկրաինայում շարունակվում են: Թուրքիայում մարտի 10-ին Ռուսաստանի եւ Ուկրաինայի արտգործնախարարների շուրջ մեկուկես ժամ տեւած բանակցությունների ընթացքում կողմերը կրկին համաձայնության չեկան: Ռուսական կողմի պահանջները չեն փոխվել. Ուկրաինայի ապառազմականացում, որի պարամետրերը պետք է համաձայնեցվեն, Ուկրաինայի ապազգայնացում, Ղրիմի ճանաչում որպես Ռուսաստանի անբաժանելի մաս: Բացի այդ Մոսկվան պնդում է Կիեւը պետք է ճանաչի Դոնեցկի և Լուգանսկի ինքնահռչակ հանրապետությունների անկախությունը: Ուկրաինան այս պահանջները համարում է անընդունելի: Իր բոլոր կործանարար հետեւանքներով հանդերձ պատերազմը շարունակվում է: Ռուս-ուկրաինական հակամարտությունը Հայաստան է բերել բազմաթիվ ռուսաստանցիների, ուկրաինացիների, ովքեր այստեղ փնտրում են անվտանգություն և հարթակ՝ պատժամիջոցների հետևանքով սահմանափակված գործունեությունը շարունակելու համար: Հատկապես նրանք, ում աշխատանքը արևմտյան ընկերությունների հետ է, ստիպված են փնտրել այլ երկիր՝ իրենց գործունեությունը շարունակելու համար։ Հայաստանը, որը փորձում է այս կոնֆլիկտում չեզոք դիրքավորվել, այսօր իր հարկի տակ է ընդունում այդ մարդկանց: Ստեղծված իրավիճակը ի՞նչ մարտահրավերների առաջ է կանգնեցնում մեր երկիրը, ի՞նչ խնդիրներ ունեն Ուկրաինայից Հայաստան եկած մեր հայրենակիցները, ի՞նչ տնտեսական հետեւանքներ կարող է ունենալ շարունակվող պատերազմը: Այս եւ այլ հարցեր՝ Region5+-ի առանցքում:
