Ահարկու պատերազմը կնոջ դեմք չունի, բայց առանց կնոջ էլ դժվար է թե՛ ռազմի դաշտում, թե՛ թիկունքում: «Region 5+» հաղորդաշարի այս թողարկման հերոսները մարտի դաշտ գնացած և թիկունքն ամուր պահող կանայք են: Չմոռանալ պատերազմի մասին նշանակում է ապրել ատելության մթնոլորտում… մոռանալ պատերազմի մասին կնշանակի սպասել նորին: Հայ ժողովուրդը պատերազմի մասին մոռանալ չի հասցնում. մշտապես հյուծիչ պատերազմների թատերաբեմում ենք եղել: Իսկ հայ կինը ցավալիորեն ու շարունակաբար իր ուսերին է կրել պատերազմի արհավիրքը: Հիշենք արցախյան ազատամարտը: Բազմաթիվ հայ կանայք այդ ժամանակ էլ կամավորական ջոկատների կազմում էին, տղամարդկանց հետ՝ առաջնագծում: Վերջին պատերազմն էլ բացառություն չէր: Մայրության և գեղեցկության տոնի առթիվ ընտրել ենք հենց այս խորագիրը՝ պատերազմն ու կանայք:
