«Կրթության ոլորտում նախատեսվող աշխատանքները միտված են լինելու քաղաքակիրթ, ստեղծագործ, նախաձեռնող, կարողունակ, մրցունակ և ապագան իր սեփական երկրում պատկերացնող քաղաքացու ձևավորմանը»: Սա հատված է կառավարության 2021-26 թվականների ծրագրից: Որպես այս արդյունքին հասնելու նախապայման Փաշինյանը 2018-ին և իշխանափոխությունից առաջ շատ անգամներ է հայտարարել, որ կրթական համակարգը պետք է զերծ պահել քաղաքականությունից, ապաքաղաքականացնել նախ և առաջ բուհերը: Որպես օրինակ նա բերում էր հոգաբարձուների խորհուրդների կազմերը, որոնք այն ժամանակ համալրված էին նախկին իշխանության ներկայացուցիչներով:
Փաշինյանը եկավ իշխանության, և հոգաբարձուների խորհուրդները շատ սահուն համալրվեցին «Քաղաքացիական պայմանագիր» կուսակցության ներկայացուցիչներով և համախոհներով:
Այսօր ԵՊՀ հոգաբարձուների խորհրդի նախագահն է ՀՀ պաշտպանության նախարար, «Քաղաքացիական պայմանագիր» կուսակցությունից Սուրեն Պապիկյանը: Հայաստանի պետական տնտեսագիտական համալսարանի հոգաբարձուների խորհրդի նախագահն է Հայաստանի նախագահի պաշտոնը զբաղեցնող Վահագն Խաչատուրյանը: Հայաստանի ազգային պոլիտեխնիկական համալսարանի հոգաբարձուների խորհրդի նախագահն է «Քաղաքացիական պայմանագիր» կուսակցությունից Տիգրան Ավինյանը: Վալերի Բրյուսովի անվան պետական համալսարան հիմնադրամի հոգաբարձուների խորհրդի նախագահի պաշտոնը 2022 թվականից զբաղեցնում է ՀՀ փոխվարչապետ, 30-ամյա Համբարձում Մաթևոսյանը:
Հետագայում, այն քննադատություններին, որ կրթական համակարգի ապաքաղաքականացում խոստացող Փաշինյանը դարձավ վարվող քաղաքականության շարունակողը, նա ասաց՝ տված շանսը չօգտագործեցին և իր կուսակցականները գնում են կրթական հաստատություններ, որքան էլ տարօրինակ հնչի, դրանց ապակուսակցականացումը պահելու համար:
Կրթական համակարգում խնդիրներն այսպիսով չեն սահմանափակվում: Բազմաթիվ առանցքային հարցեր շարունակում են մտահոգել ոլորտի պատասխանատուներին:
Կա՞ արդյոք ներառական կրթական միջավայր, շարունակում է խնդրահարույց մնալ կրթության բովանդակությունը և կրթական ծրագրերի արդիականացումը, դպրոցների վերանորոգումն ու վերազինումը, ուսուցիչների մասնագիտական զարգացումը և այլն:
