Ինչպես հանրապետության այլ մարզերում, Սյունիքի՝ Գորիս, Կապան, Մեղրի, Սիսիան համայնքներում ևս ձևավորվել են միասնական սոցիալական ծառայություններ՝ միավորելով տվյալ տարածքում մինչ այդ գործող սոցիալական պաշտպանության ոլորտի չորս կառույցներ՝ սոցիալական ապահովություն, բժշկասոցիալական փորձաքննություն, զբաղվածության պետական գրասենյակ, ինչպես նաև մարզային ենթակայության սոցիալական աջակցության գործակալություներ։
Ծառայությունն իրականացնում է կենսաթոշակների, նպաստների և սոցիալական ապահովության ծրագրերով նախատեսված այլ դրամական վճարների նշանակում և տրամադրում, կյանքի դժվարին իրավիճակում հայտնված անձանց սոցիալական կարիքների գնահատում և բավարարում, կայուն զբաղվածության ապահովմանը միտված պայմանների ստեղծում, բժշկասոցիալական փորձաքննության իրականացում, աջակցող միջոցների տրամադրում և այլն։Համակարգի ներդրումը նպատակ ունի բարելավել սոցիալական ծառայությունների որակը։ Աշխատանքի արդյունավետության և որակի համար կարևոր է նաև շենքային պայմանների փոփոխությունը, այդ կառույցների ֆիզիկական տեղակայումը նույն շենքում։
Մինչ նոր համակարգի ստեղծումը, քաղաքացին ստիպված էր բավական ժամանակ ծախսել գրեթե նույն բովանդակությամբ ծառայություններից օգտվելու համար, քանի որ դրանց վարչական շենքերը գտնվում էին քաղաքի տարբեր հատվածներում։ Նախկինում որևէ փաստաթղթի համար քաղաքացին ստիպված էր մի քանի օր տարբեր տեղ այցելել, այժմ ծախսում է առավելագույնը տասը րոպե։
«Հիմա երբ քաղաքացին կենսաթոշակի անցնելու համար դիմում է ներկայացնում, և եթե զբաղվածության կենտրնում գրանցված է՝ապա դա շատ արագ է կատարվում, միանգամից մի կաբինետից վերցնում է անհարաժեշտ տեղեկանքը, մտնում մյուս կաբինետը»,–ասում է Միասնական սոցիալական ծառայության Գորիսի տարածքային կենտրոնի ղեկավար Վարուժան Ալեքսանյանը և հավելում, որ եթե նախկինում քաղաքացին պետք է մտներ դիմում նշանակող մասնագետի մոտ, ապա հիմա բացարձակապես դա չի թույլատրվում։
Միասնական կենտրոնների ձևավորումը նպատակ ունի նաև բացառել կոռուպցիոն ռիսկերը սոցիալական ապահովության գործընթացում։
Կենտրոններն ունեն նաև իրազեկման գործառույթ, օրինակ, թե որ ժամկետում և ի՞նչ կարգով անձը պետք է դիմի տարիքային, մասնակի կենսաթոշակ ստանալու և նաև հաշմանդամության կարգ ստանալու համար։
Կենտրոնների արդյունավետ աշխատանքի կազմակերպման առավելություններից մեկը օնլայն ռեժիմով աշխատանքի կազմակերպումն է, այսինքն Գորիս համայնքի անձնագրային գրանցում ունեցող քաղաքացին կարող է այլ համայնքի, միասնական սոցիալական տարածքային կենտրոններից որևէ մեկում հանձնել իր փաստաթղթերը։
Միասնական կենտրոնների ձևավորումը համընկավ քառասունչորսօրյա պատերազմի հետ այն առումով, որ մի քանի անգամ ավելացել են խոցելի խմբերը, սոցիալական անապահովության պետական քաղաքականության շահառուները։ Եվ նրանց միաժամանակյա «փաստաթղթավորման» հնարավորությունը նույն վայրում ծառայության ակնհայտ առավելություններից մեկն է։
