Մարիամ Մաթևոսյան
Սեպտեմբերի 29-ը հերթական անգամ գորիսեցիների համար նշանավորվեց «Գորիսյան օրեր» ամենամյա տոնակատարությամբ, որի շրջանակներում քաղաքի տարբեր փողոցներում կազմակերպվել էին ավանդական հյուրասիրություններ, ցուցահանդեսներ, սպորտային միջոցառումներ:
Քաղաքը հյուրընկալել էր ոչ միայն Հայաստանի քաղաքներից, այլև` տարբեր երկրներից ժամանած մարդկանց: Գորիս էին ժամանել Ֆրանսիայի պատվիրակությունը՝ Վիենի քաղաքապետ Ժակ Ռեմիլիեի գլխավորությամբ, Բելառուսի պատվիրակությունը, ինչպես նաև ֆրանսահայ բարեկամ, «Երկիր և մշակույթ» ՀԿ-ի պատասխանատու Ժո Փափազյանը և այլք:Միջոցառումների մեկնարկը տրվեց Հին Գորիսում գտնվող «Սուրբ Հռիփսիմե» եկեղեցու խաչի վերաօծման արարողությամբ, որը կատարեց Մայր Աթոռ Սուրբ Էջմիածնի Վարչա-Տնտեսական բաժնի պատասխանատու Տ. Մուշեղ եպիսկոպոս Բաբայանը, Սյունյաց Թեմի առաջնորդական տեղապահ Տ.Մակար Վարդապետ Հակոբյանը, Գորիսի տարածաշրջանի հոգևոր հովիվ Տ. Շիրակ Քահանա Խանոյանը: Մատուցվեց պատարագ` Վարագա Sուրբ Խաչի տոնի կապակցությամբ, որը անց է կացրել Սյունյաց թեմի առաջնորդական տեղապահ Տեր Մակար Վարդապետ Հակոբյանը:
Ողջույնի խոսքով հանդես եկավ նաև Գորիսի քաղաքապետ Նելսոն Ոսկանյանը: Նա ևս շնորհակալություն հայտնեց ներկաներին՝ միջոցառմանը մասնակցելու համար:
Պատարագից հետո ներկաներին մատուցվեց մատաղ: Այնուհետև ներկայացուցչական կազմը ծաղկեպսակներ դրեց Սերո Խանզադյանի և Ակսել Բակունցի հուշարձաններին: Հաջորդ կանգառը Բակունցի տուն-թանգարանում էր:
Հանդիսույթի առթիվ քաղաքի Մխիթար Սպարապետի անվան հրապարակում կազմակերպվել էր ցուցահանդես, որտեղ ներկայացված էր Արվեստի դպրոցի սաների ու այլ ստեղծագործողների աշխատանքներ: Երաժշտական կատարումներով հանդես եկան Ա. Սաթյանի անվան երաժշտական դպրոցի սաները:
Միջոցառումները եզրափակվեցին համերգային ծրագրով և շքեզ հրավառությամբ:
