Սեպտեմբերի 25-ին արդեն միավորված Սիսիան համայնքում տեղի կունենան ՏԻՄ համամասնական ընտրություններ։ Բազմաբնակավայր Սիսիան համայնքն իր մեջ կներառի նախկինում խոշորացված Սիսիան և Գորայք համայնքները, որը կընդգրկի 36 բնակավայր՝ մոտ 31 հազար բնակչությամբ։ Համայնքի ավագանու համար 2 դաշինք և 5 կուսակցությունից հայտ է ներկայացրել 314 թեկնածու, նրանցից ինն արդեն ինքնաբացարկ է հայտնել։
Ինչպես տեղեկացրեց թիվ 34 տարածքային ընտրական հանձնաժողովի նախագահ Սլավիկ Դադաշյանը, այս օրերին տեղի ունեցող ռազմական գործողությունների պայմաններում Սիսիանում անցկացվելիք ընտրությունների հետաձգման մասին որոշում չկա, քանի որ «Ընտրությունների մասին» ՀՀ օրենքի 7-րդ հոդվածով ընտրությունները կարող են հետաձգվել երկրում ռազմական դրություն հայտարարվելու դեպքում։
Նրա խոսքով թեկնածուները ընդհատել են քարոզարշավը․ ըստ բանավոր խոսակցությունների,, նրանց մի մասը ներգրավվել է պաշտպանական գործընթացում։
Միավորվող համայնքներում ընտրողների թիվը կազմում է 22,929, որից 1641-ը հակառակորդի նշանառության տակ գտնվող Իշխանասարում և 311-ը՝ Նորավանում։
Հիշեցնենք, որ, սեպտեմբերի 13-ին, ժամը 00։05-ից Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ։ Հարվածներ են հասցվել նաև քաղաքացիական ենթակառուցվածքներին։
