ՀՀ Կրթության, գիտության, մշակույթի և սպորտի նախարարության տվյալներով, տարեկան ուսուցչի ավելի քան 600-700 տեղ թափուր է մնում և չի լրացվում։ Հատկապես բնագիտական և մաթեմատիկական ուղղվածությամբ մասնագետների, և այս ոլորտում սովորող ԲՈՒՀ-երի շրջանավարտներից քչերն են ընտրում ուսուցչի մասնագիտությունը։
Ակնհայտ է նաև, որ չնայած Հայաստանում ՏՏ ոլորտը զարգանում է, այնուամենայնիվ, մասնագետների քանակն արդեն իսկ չի բավարարում ընդլայնվող ոլորտի կարիքները։ Առաջնահերթ պատճառներից է նաև այն, որ դպրոցական տարիքից համապատասխան բնագիտամաթեմատիկական կրթություն չեն ստանում բազմաթիվ աշակերտներ, ովքեր հետագայում կկարողանային ներդնել իրենց ներուժը ՏՏ ոլորտում։
Tec4Armenia-ն համագործակցային նախաձեռնություն է՝ հիմնադրված «Դասավանդի՛ր, Հայաստան»-ի և Հայաստանի առաջավոր ՏՏ ընկերությունների կողմից։ «Դասավանդի՛ր, Հայաստան»-ը գործում է Հայաստանի 100 համայնքում։ Գործընկեր կազմակերպությունների ՏՏ ոլորտում զբաղված աշխատակիցների համար ստեղծվում է հեռավար, ճկուն գրաֆիկով աշխատելու հնարավորություն, որպեսզի «Դասավանդի՛ր, Հայաստան»-ի աջակցությամբ նրանք կարողանան դասավանդել Հայաստանի գյուղական դպրոցներում։
Ծրագրի մասնակիցները հնրավորություն ունեն՝
- հեռավար աշխատել ներկայիս գործատուի հետ
- դասավանդելով հիմնադրամի գործընկեր համայնքներից մեկում` ստանալու լրացուցիչ ֆինանսական օժանդակություն «Դասավանդի’ր, Հայաստան»-ի կողմից
- հանդիսանալ հանրակրթական դպրոցի ուսուցիչ համապատասխան վարձատրությամբ
- պահպանել ներգրավվածությունը ՏՏ –ում
- մասնակցել շարունակական մասնագիտական և առաջնորդական հմտությունների զարգացմանն ուղղված դասընթացներին և իրականացնել համայնքային ներազդեցության նորարարական նախագծեր։
Ծրագրի պահանջներն են՝
- բակալավրի առկայություն
- մասնագիտացում, որը համապատասխանում է «տեղակայման չափորոշիչներին»
- վարժ տիրապետել հայերենին և ունենալ գրավոր և բանավոր հաղորդակցության գերազանց հմտություններ
- պատրաստակամություն երկու տարի ապրելու և դասավանդելու «Դասավանդի՛ր, Հայաստան»–ի գործընկեր համայնքներից մեկում։
Առաջին տարում, կախված տեղակայման համայնքից, «Դասավանդի՛ր, Հայաստանի»–ի կողմից ուսուցիչ–առաջնորդը կստանա ամսական կրթաթոշակ՝ 130 հազար դրամ, ինչպես նաև ամսական լրացուցիչ 60 հազար դրամ «Ստարտափ Արմենիան»-ի կողմից, կախված դասաժամերից՝ ի լրումն տեղակայման դպրոցից ստացվող ձեր աշխատավարձի, որտեղ դասավանդելու եք։ Ծրագրի աջակիցները ուսուցիչ-առաջնորդներին տրամադրում են անվճար հեռախոսներ և շարժական ինտերնետային ծառայության փաթեթներ։
Երկրորդ տարում «Ստարտափ Արմենիա»-ի կողմից տրամադրվող ռեսուրսների և աջակցության շնորհիվ ուսուցիչ–առաջնորդը հնարավորություն կունենա դիմելու համայնքային ազդեցության դրամաշնորհին։ Դրա միջոցով հնարավորություն կտրվի ֆինանսավորել այնպիսի նորարական ծրագիր, որը կաջակցի տեղացիներին գաղափարի իրականացմանը և կամրապնդի քաղաքացիական պատասխանատվությունն ու համաշխարհային փոխկապվածությունը։ Ֆինանսական աջակցությունը տատանվում է 500-ից մինչև 2 հազար ԱՄՆ դոլարի սահմաններում՝ կախված առաջարկված ծրագրի մասշտաբներից։
Տաղանդների ներգրավման և զարգացման գծով տնօրեն Գոռ Նազարյանը ծրագրի վերաբերյալ համապատասխան տեղեկատվությունը ներկայացրեց «Ինստիգեյթ Մոբայլ» Գորիսի մասնաճյուղի աշխատակիցներին, և թե ինչ հեռանկարներ կարող են ունենանալ ՏՏ ոլորտում մասնագիտական կարողությունների զարգացման գործում։
