Գորիսի քաղաքային պատկերասրահում տեղի ունեցավ ՀՀ գրողների միության անդամներ Լևոն Սահակյանի, Վարուժան Գալստյանի և Վարդան Սարգսյանի գրական ստեղծագործական ցերեկույթը, որի ընթացքում ներկայացվեց նրանց ստեղծագործական գործունեությունը, որոնք տարբեր ժամանակներում տպագրվել են լրատվամիջոցներում, գրական պարբերականներում, նաև առանձին գրքերով։
Բանասիրական գիտությունների թեկնածու, դոցենտ Թեհմինա Մարությանը հակիրճ ներկայացրեց նրանց ստեղծագործությունները, նշելով, որ Հայաստանի գրողների միության Սյունիքի մասնաճյուղի նախագահ Լևոն Սահակյանի պոեզիան շարունակում է Սյունիքի գրական ընտանիքի գրական ավանդույթների «առողջ երակը»։ Այդ են վկայում հեղինակի ստեղծագործություններն ամփոփող տասնչորս գրքերը։
Բանախոսի կարծիքով Վարուժան Գալստյանի ստեղծագործությունների սեղմությունը, իմաստային խտացումներն ու պատկերայնությունը տպավորիչ են։ «Գրողն ունի ուրույն գրական ճաշակ, որը հեռու է հռետորաբանությունից, բառախտից, որով շատ գրողներ են տառապում և տառապեցնում ընթերցողներին»—ասաց նա։
Անդրադառնալով Վարդան Սարգսյանի պատմվածքներին, Թ․ Մարությանը նշեց, որ «դրանք ժամանակակից արձակի գրականության ձեռքբերումներից են»։ Ըստ նրա, գրականության գործառույթը գեղարվեստականությունը և պատկերայնությունն են, և այն ամենն, ինչի մասին գրում է Վարդան Սարգսյանը, շատ կարևոր է, որպեսզի դա քո սրտի էջը համարես։
Գորիսի համայնքապետրանի հանրային կապերի, կրթության, մշակույթի, սպորտի, երիտասարդության և սոցիալական հարցերի բաժնի պետ Արմինե Հովակիմյանը կարևորեց միջոցառման ձևաչափը, և համայնքի ղեկավար Առուշ Առուշանյանի կողմից շնորհակալագրեր հանձնեց ստեղծագործողներին՝ համայնքի գրական–մշակութային կյանքում ունեցած մեծ ավանդի համար։
