Օրեր առաջ ՀՀ նկարիչների միության Սյունիքի մասնաճյուղի և Ակսել Բակունցի տուն–թանգարանի հետ համատեղ Գորիսում կազմակերպվել էր պլեներ–սիմպոզիում` Ակսել Բակունցի ծննդյան 125-ամյակի առթիվ։ Հենրիկ Իգիթյանի անվան գեղագիտության ազգային կենտրոնի Գորիսի ստրոբաժանման տնօրեն Արամ Մաշուրյանը ՀՀ նկարիչների միության անդամների՝ 8 հայտնի նկարիչների, հրավիրել էր մասնակցելու նկարչական սիմպոզիումին, որի թեման էր՝ Գորիսը գեղանկարիչների աչքերով։ Ակսել Բակունցի տուն–թանգարանի ղեկավար Վարդան Սարգսյանի խոսքով՝ սիմպոզիումին մասնակցած նկարիչների աշխատանքները կցուցադրվեն հունիսի 13-ին, գրողի ծննդյան 125-ամյակի տոնական միջոցառումների շրջանակում՝ տուն-թանգարանում։
Արամ Մաշուրյանի խոսքով, ում անմիջական նախաձեռնությամբ էր կազմակերպվել պլեներ–սիմպոզիումը, նշեց, որ մեծ գրողին նվիրված տոնական միջոցառումներին՝ գեղանկարչական ցուցադրությունից հետո մեկական նկար կնվիրեն Ակսել Բակունցի տուն- թանգարանին՝ մշտական ցուցադրության համար։ Նկարչական սիմպոզիումն ավարտվել է մայիսի 9-ին, սակայն նկարիչներն իրենց արված էտյուդների վրա, որոնք 20-ից ավելի են, կաշխատեն արդեն իրենց արվեստանոցներում։ Ա․Մաշուրյանի խոսքով՝ հայտնի նկարիչների հետ սիմպոզիումին մասնակցել են նաև իր սաները, ովքեր ուսանում են Գեղարվեստի պետական ակադեմիայում և Գորիսի պետական համալսարանում։
Ծննդով գորիսեցի Դիանա Յոլյանը, ով Գեղարվեստի պետական ակադեմիայի գրաֆիկայի բաժնի 4-րդ կուրսի ուսանողուհի է, ասում է, որ իրեն էլ՝ որպես Արամ Մաշուրյանի սան, հնարավորություն է ընձեռվել հայտնի նկարիչների հետ մասնակցել սիմպոզիումին․ «Բավականին հետաքրքիր, տարբեր մտածողությամբ նկարիչներ էին, և կոնկրետ մեզ՝ Գեղարվեստի պետական ակադեմիայի երեք ուսանողներիս համար մեծ փորձ ու լավ հնարավորություն էր միանալ ճանաչված նկարիչներին և այդ մի քանի օրն աշխատել նրանց կողքին»,–ասում է նա։ Այդ մի քանի օրերին բավական խիտ և հագեցած էր նկարիչների գրաֆիկը, աշխատել են հիմնականում Հին Գորիսում և մեկ օր Հին Խնձորեսկում։
