Անահիտ Բաղդասարյան
Մարտի 25-ին Գորիսի Վաղարշ Վաղարշյանի անվան պետական դրամատիկական թատրոնի բեմին «Իմ սիրտը լեռներում է» և «Փոքր բնակարան մեծ պատշգամբով» բեմադրությունները, որոնք ներկայացված են Հայաստանի թատերական գործիչների միության «Արտավազդ» ամենամյա մրցանակաբաշխությանը: Բեմադրությունները գնահատելու և ներկայացված անվանակարգերի մրցանակակիրներին որոշելու համար Երևանից ժամանել էր ռեժիսորներից, դերասաններից, թատերագետներից կազմված փորձագետների խումբ:
Գորիսի դրամատիկական թատրոնի ռեժիսոր Գոռ Մարգարյանի՝ Վիլյամ Սարոյանի «Իմ սիրտը լեռներում է» ստեղծագործության հիման վրա բեմադրության մասնակից 3 դերասան առաջադրվել է 3 անվանակարգերում. Լյովա Հակոբյանը՝ «Լավագույն երիտասարդ դերասան», Ռոբերտ Աղաջանյանը՝ «Լավագույն դերասան», իսկ Սեյրան Մկրտչյանը՝ «Երկրորդ պլանի լավագույն տղամարդ դերակատար» անվանակարգերում:
Երիտասարդ դերասան Լյովա Հակոբյանի համար անպասելի էր այս տեսակ մրցանակաշխության մասնակցելը. «Ինձ համար մեծ անակնկալ էր իմ անունը որևէ անվանակարգում տեսնելը, բայց նաև մեծ ուրախություն ապրեցի, երբ լսեցի այդ մասին»,- շփոթված նշեց նա: Իսկ ներկայացման ռեժիսոր Գոռ Մարգարյանի խոսքով՝ 3 դերասաններն էլ մրցանակի արժանի թեկնածուներ են: «Եթե անկեղծ լինեմ, հույսեր ունեմ, որ կհաղթենք: Արժանի թեկնածուներ են. այնպես չէ, որ վախենում ենք երևանյան կամ այլ մարզերի դերասանների հետ մրցակցությունից»,- ավելացրեց Գորիսի դրամատիկական թատրոնի գեղարվեստական ղեկավարը:
Այնուհետև Կապանի Շիրվանզադեի անվան պետական դրամատիկական թատրոնի դերասանները հանդես եկան «Փոքր բնակարան մեծ պատշգամբով» ներկայացմամբ, որի գլխավոր դերասան Նատալյա Բաղդասարյանը առաջադրվել է «Լավագույն կին դերակատար» անվանակարգում: Կապանի թատրոնի տնօրեն Կամո Արզումանյանի խոսքով՝ կարևորը ներկայացումը ընդունվել է հասարակության կողմից, իսկ թե «Նատալյան կհաղթի, թե՝ ոչ, թող ժյուրին որոշի»:
Հիշեցնենք, որ ՀԹԳՄ «Արտավազդ» ամենամյա մրցանակաբաշխությունը տեղի կունենա Թատրոնի միջազգային օրը: Իսկ մրցանակները կշնորհվեն մրցանակաբաշխության նախորդ տարվա մարտի 1–ից մինչև մրցանակաբաշխության տարվա մարտի 1–ը ընկած ժամանակահատվածում առավել աչքի ընկած թատերական աշխատանքներին:
