Մարիամ Մաթևոսյան
Մայիսի 17-ին` ժամը 12:00-ին, Սյունիքի մարզի բոլոր ընտրատեղամասերում տեղի ունեցավ տեղամասային ընտրական հանձնաժողովի առաջին նիստը: Գորիս համայնքի թիվ 37/5 տեղմասային ընտրական հանձնաժողովի 8 անդամներից ներկա էին 5-ը: Քվորում ապահովելով՝ հանձնաժողովի նախագահ, Հանրապետական կուսակցության անդամ Աննա Սարգսյանը սկսեց նիստի օրակարգով նախատեսված հարցերի քննարկումը: Քարտուղար Կարինե Ավչյանը, որին առաջադրել է «Ժառանգություն» կուսակցությունը, գրանցամատյանում նշեց ներկաների անունները, որից հետո տեղի ունեցավ ծանոթություն հանձնաժողովի անդամների միջև: Այս տեղամասային ընտրական հանձնաժողովում իրենց թեկնածուներին են ներկայացրել նաեւ «ԲՀԿ», «ՕԵԿ», «ՀՅԴ», «ՀԱԿ» կուսակցությունները, սակայն միայն ներկայացել է «ԲՀԿ»-ի ներկայացուցիչը:Թիվ 37/5 տեղմասային ընտրական հանձնաժողովի նախագահը Ա. Սարգսյանը նշեց, որ ընտրական գործընթացն անցնում է բնականոն հունով: Նրա խոսքով՝ խնդիրներ առաջանում են հիմնականում ընտրության օրը, քանի որ մինչ այդ քաղաքացին չճշտելով, թե արդյոք իր անունը կա ընտրացուցակներում, ներկայանում է ընտրատեղամաս: «Նման դեպքերում քաղաքացուն առանց ձայնի չենք թողում, հատուկ գրություն ենք ուղարկում Գորիսի անձնագրային բաժին ու քաղաքացին կատարում է իր օրենքով նախատեսված կրագը»,-ավելացնում է Ա. Սարգսյանը:
Թիվ 37 ընտրատարածքային ընտրական հանձնաժողովի առաջին նիստ է տեղի ունեցել նաև թիվ 37/7 տեղամասում: Նիստը վարել է հանձնաժողովի նախագահ, Հանրապետական կուսակցության անդամ Միսակ Հովակիմյանը: Այստեղ ևս հանձնաժողովի 8 անդամներից նեկայացել է 5-ը: Հանձնաժողովի քարտուղար «Ժառանգության» կուսակցության ներկայացուցիչն է, իսկ մյուս հանձնաժողովի ներկայացուցիչներին առաջադրել է «ԲՀԿ», «ՀԱԿ», «ՀՅԴ» կուսակցությունները, ինչպես նաև կային անկուսակցական անդմաներ: Հաջորդ նիստը տեղի կունենա հունիսի 7-ին:
Հիշեցնենք, որ հունիսի 8-ին ՏԻՄ ընտրություններ կլինեն Գորիսում ու Թանահատում՝ համայնքի ղեկավարի, իսկ Իշխանասարում` ավագանու ընտրություններ:
hetq.am
