Մարիամ Մաթևոսյան
Այս օրերին բազմաթիվ քաղաքացիներ զանգահարում են Մամուլի ակումբ, հարցնելով, թե արդյոք հնարավոր է նույնականացման քարտով մասնակցել հունիսի 8-ին կայանալիք Գորիս համայնքի ղեկավարի ընտրությանը: Հարցի պարզաբանման համար դիմեցինք թիվ 37 ընտրատարածքային ընտրական հանձնաժողովի նախագահ Արմեն Ստեփանյանին, ով նշեց, որ ընտրություններին կարող են մասնակցել նաև նույնականացման քարտով, առանց անձնագրի. «Նույնականացման քարտով քաղաքացին ընտրում է ինչպես անձնագրի առկայության դեպքում, ոչ մի սահմանափակում չկա, միանշանակ ընտրողը մասնակցում է ընտրություններին, միայն մեկ տարբերությամբ՝ քարտը չի դրոշմակնքվում»: Նրա խոսքով՝ ընտրողի տվյալներում նշվում է նույնականացման քարտի համարը կամ Հանրային ծառայությունները կրգավորող հանձնաժողովի համարանիշը:
2014 թվականին թիվ 37 ընտրատարածքում երկրորդ անգամ կանցկացվի տեղական ինքնակառավարման մարմինների ընտրություններ: Այս տարվա գարնանը ՏԻՄ ընտրություններ են եղել նաև Սիսիանի Տորունիք և Նժդեհ համայնքներում, որտեղ, ըստ Ա. Ստեփանյանի, նույնականացման քարտով ընտրող չի եղել, բայց քանի որ այս ընտրությունը տեղի կունենա համեմատաբար մեծ համայնքում, ուստի հանձնաժողովներին լրացուցիչ կտեղեկացնեն նույնականացման քարտի օգտագործման մասին:
Հիշեցնենք, որ էլեկտրոնային նույնականացման քարտ կարող է ստանալ 16 տարեկանից բարձր ցանկացած ՀՀ քաղաքացի, որը կփոխարինի ներկայիս անձնագրին և կծառայի ՀՀ տարածքում:
