Մարիամ Մաթևոսյան
Հունիսի 8-ին կայանալիք Գորիս համայնքի ղեկավարի ընտրությունների պաշտոնական քարոզչության 6-րդ օրն է, բայց թեկնածուները դեռևս չեն հրապարակել իրենց նախընտրական ծրագրերը: Համեմատաբար ակտիվ են ընտրական շտաբերում:
ՀՀ Ընտրական օրենսգրքի Գլուխ 5/Նախընտրական քարոզչություն/, Հոդված 18-ի 5-րդ կետի համաձայն, թեկնածուները կարող են կազմավորել ընտրական շտաբեր՝ որոշակի բացառություններով. ընտրական շտաբերը չեն կարող տեղակայվել պետական և տեղական ինքնակառավարման մարմինների զբաղեցրած շենքերում (բացառությամբ այն դեպքերի, երբ շտաբերը զբաղեցնում են այդ մարմիններին չպատկանող տարածք), ինչպես նաև այն շենքերում, որտեղ գործում են ընտրական հանձնաժողովները:ՀՀԿ-ից առաջադրված Վաչագան Ադունցի համակիրները ձևավորել են 9 նախընտրական շտաբ: «Օրենքը թույլ է տալիս ընտրական տեղամասերի թվով ունենալ շտաբեր ու մենք օրենքի սահմաններում ունենք: Գտնվում են քաղաքի տարբեր հատվածներում»,-ասում է Վ. Ադունցի Գետափնյա թաղամասում տեղակայված շտաբի պետ Ռուստամ Ակլունցը: Նրա խոսքով՝ որպես քարոզչության միջոց, փորձում են շտաբերի միջոցով ընտրողին հասցնել, քարոզել իրենց ընտրական ծրագրերը ու ավելի հաճախ ընտրողների հետ հանդիպումները հենց այնտեղ էլ կայանում են:
Համայնքի ղեկավարի թեկնածու Հրայր Յոլյանն առայժմ, կարծես թե, չի շտապում քարոզչություն ծավալել, բայց նրա նախընտրական շտաբում ևս աշխուժություն է: Ընտրական շտաբերի վրա տեղադրված ցուցանակները սույն օրենքով քարոզչական տպագիր նյութեր չեն համարվում, եթե դրանք չեն ներառում թեկնածուին, դրանց թիվը չի գերազանցում ընտրության համար կազմավորված ընտրական տեղամասերի թիվը, և յուրաքանչյուր պաստառի (ցուցանակի) մակերեսը չի գերազանցում 6 քառակուսի մետրը: Երկու թեկնածուներն իրենց պաշտոնական քարոզչությունում դեռևս ակնառու սխալներ թույլ չեն տալիս:
Հիշեցնենք, որ համայնքի ղեկավարի պաշտոնի համար հավակնում են ՀՀԿ-ից առաջադրված Վաչագան Ադունցն ու անկուսակցական Հրայր Յոլյանը: Ավելի վաղ ինքնաբացարկ են հայտնել Արա Բուդաղյանն ու Տիգրան Կարապետյանը:
