Սուսաննա Շահնազարյան
Հուլիսի 24-ին կլրանա Գորիսի համայնքային իշխանության ղեկավար Նելսոն Ոսկանյանի լիազորությունների ժամկետը , և նա հրաժեշտ կտա իր աթոռին: Արդյո՞ք նա ափսոսում է, որ իր թեկնածությունը չի առաջադրել հունիսի 8-ին կայանալիք քաղաքապետի ընտրություններում, ինչպե՞ս է գնահատում որպես համայնքի ղեկավարի, իր կատարած աշխատանքը. այս և այլ հարցերի շուրջ զրուցեցինք գործող համայնքի ղեկավարի հետ.
–Պարոն Ոսկանյան, 2000 թվականից Գորիսի քաղաքապետն եք, կուզենայի՞ք նորից առաջադրվել:
-Ինչո՞ւ ոչ:
-Այդ դեպքում ինչո՞ւ Ձեր թեկնածությունը չառաջադրեցիք:
-Ես Հանրապետական կուսակցության անդամ եմ, նախորդ անգամներ առաջադրվել եմ կուսակցության կողմից:
-Այսինքն Ձեզ չվստահեցի՞ն:
-Ես որոշել էի չառաջադրվել:
–Բայց եթե առաջարկեին, կհամաձայնվեի՞ք:
-Անշուշտ:
-Բավական ակտիվ, երկակի քննարկումներ են ծավալվում ընթացիկ ընտրությունների թեկնածուներին պաշտպանող անձանց շուրջ: Խոսակցություններ են պտտվում, որ թեկնածուներից մեկին պաշտպանում է ներկա, մյուսին` նախկին մարզպետը: Երկուսն էլ հանրապետական կուսակցության անդամներ են, բայց տարբեր մարդկանց են սատարում: Ասում են նաև, որ այդ հակասության պատճառով է, որ թեկնածուներից մեկը, ով ընտրություններում հաղթելու ավելի մեծ հավակնություն ուներ, ինքնաբացարկ է հայտնել: Դուք ինչպե՞ս եք վերաբերվում ստեղծված իրավիճակին և ու՞մ նախապատվություն կտայիք, եթե երկուսն էլ շարունակեին պայքարել:
-Նախ, ես չեմ կարծում, որ հին կամ նոր մարզպետը ինչ որ մեկին պաշտպանում են, բայց ես պաշտպանում եմ այն թեկնածուին, ում աջակցում է ՀՀԿ-ն, որի անդամ եմ նաև ես:
-Երբ 2000թ.-ին առաջին անգամ քաղաքապետ ընտրվեցիք, ո՞րն էիք համարում Ձեր ամենակարևոր քայլը:
– Մարդկանց մտածողությունն էի ուզում փոխել, որովհետև մարդկանց մի խումբ կա, ովքեր մշտապես դժգոհ են, քննադատում են, իրենց սոցիալական չլուծված խնդիրները ևս կապում են քաղաքական, տնտեսական իրավիճակի հետ: Այս առումով երևի քիչ բան հաջողվեց, որովհետև մարդիկ շարունակում են շտապ եզրակացություններ անել յուրաքանչյուր իրադարձության մասին: Դրանով նաև վերաբերմունք է ձևավորվում իշխանության նկատմամբ:
-Իսկ ի՞նչ հաջողվեց:
-Քաղաքի բարեկարգում` տարբեր ենթակառուցվածքների ապահովում. ջրամատակարարման, ոռոգման, լուսավորության, փողոցների ասֆալտապատման, կանաչապատման, ճանապարհների ճանապարհային նշանների տեղադրման, աղբահանության որոշակի բարելավման, տեխնիկայի թարմացման հետ կապված զգալի աշխատանքներ են իրականացվել:
-Դուք մատնանշում եք այնպիսի հարցեր, որոնց համար Ձեզ հաճախ քննադատում են:
-Քննադատում են, որովհետև հնարավորությունների և կարիքների անհամաչափություն կա, միջոցները սուղ են:
–Բայց Դուք նշում էիք, որ այս տարի, վերջապես, համայնքն ունեցավ ռեկորդային ֆոնդային բյուջե:
-Այո, և եթե ավագանին տարեսկզբին հաստատեր բյուջեում առաջարկվող փոփոխությունը, մինչև այժմ զգալի աշխատանք կիրականացվեր, քանի որ արդեն հստակ նշվել էր, թե ինչ խնդիրներ պիտի լուծվեին:
-Այսինքն կարծում եք, որ ընտրություններն ավելի ուշ լինեին, օրինակ, անգամ սեպտեմբերին, կհասցնեիք ավարտել 14 տարվա ընթացքում չարվածը:
-Այնպիսի տպավորություն մի ստեղծեք, թե ոչինչ չի արվել: Մենք չենք գերագնահատել մեր հնարավորությունները: Յուրաքանչյուր տարվա համար առանձնացվել է առավել հրատապ լուծում պահանջող հարցը և միջոցներն ուղղվել են դրան:
-Հնարավո՞ր է, որ Ձեզ փոխքաղաքապետի պաշտոն առաջարկեն, և Դուք համաձայնվեք: Շարունակեք կիսատ մնացած գործերը:
-Ես դեռ համայնքային խորհրդի անդամ եմ, կշարունակեմ մասնակցել համայնքային կյանքին:
-Այդ դեպքում շարունակելով լինել իշխանության մեջ, չե՞ք մտածում, որ կշարունակեն մեղադրել այն բանի համար, որ համայնքային տարբեր մրցույթներում միշտ հաղթող է ճանաչվում «Գորեր» ընկերությունը, որի հիմնադիրը Դուք եք:
-Միայն ես չեմ, ընտանեկան բիզնես է, բարեկամներ են նաև, բայց բոլոր մրցույթներն անցկացվել են օրենքով սահմանված կարգով:
-Եվ Դուք քննադատության եք արժանանում նաև այն բանի համար, որ համայնքային իշխանության աշխատակազմում, ավագանու անդամների ցանկում զգալի թվով Ձեր ազգականներն են ընդգրկված:
-Ես այդպես չէի բնորոշի, մենք, ուղղակի լավ թիմ ենք ստեղծել տարիների ընթացքում:
-Հիմա ստիպված եք թողնել այդ թիմը և հեռանալ, ինչո՞վ եք զբաղվելու:
-Վաղուց մտածում եմ Գորիսում գինու գործարան կամ գոնե գինետուն հիմնադրելու մասին, երևի վերջապես նախաձեռնեմ:
-Իսկ հնարավո՞ր է, որ որպես գինու հումք, օգտագործեք Գորիսի Որոտանի այգիների խաղողը, որտեղ նաև Ձեր սեփականություն համարíող ասֆալտբետոնե գործարանն է և աղտոտում է շրջակայքը:
-Չեմ ժխտում, հնարավոր է, որ շրջակայքը բացարձակ մաքուր չի, բայց ձեռնարկությունում անվտանգության համապատասխան նորմատիվները պահպանվում են:
–Դուք այլևս քաղաքի առաջին դեմքը չեք և նաև դրա համար սկսեն քննադատել Ձեզ:
-Դրան ես պատրաստ եմ 2000թվականից, երբ առաջին օրը որպես քաղաքապետ, աշխատասենյակ մտա:
-Իսկ հիմա գնալուց ի՞նչ եք տանելու այդտեղից:
-Բլոկնոտներս…միայն:
