Մարիամ Մաթևոսյան
ՀՀ Ընտրական օրենքի Հոդված 32-ի համաձայն, «թեկնածուներն ընտրական հանձնաժողովներում, պետական և տեղական ինքնակառավարման մարմինների, կազմակերպությունների, զանգվածային լրատվության միջոցների հետ փոխհարաբերություններում իրենց շահերը պաշտպանելու նպատակով կարող են ունենալ վստահված անձինք»: Սույն օրենքի համաձայն, ընտրական ցուցակները գրանցելուց հետո` հնգօրյա ժամկետում, գրանցում իրականացրած ընտրական հանձնաժողովը թեկնածուի, կուսակցության, կուսակցությունների դաշինքի լիազոր ներկայացուցչին տալիս է կազմավորված ընտրական տեղամասերի թվի եռապատիկին հավասար թվով վստահված անձանց վկայականներ: Ըստ այդ օրենքի՝ հունիսի 8-ին կայանալիք Գորիսի համայնքի ղեկավարի ընտրություններում 9 տեղամասում յուրաքանչյուր թեկնածու կարող է ունենալ մինչև 27 վստահված անձ:Համայնքի ղեկավարի պաշտոնի համար հավակնող ՀՀԿ-ից առաջադրված Վաչագան Ադունցի նախընտրական շտաբից տեղեկացվում են, որ այսօրվա դրությամբ թեկնածուն ունի երկու վստահված անձ: Այն հարցին, թե ինչու երկու վստահված անձ, եթե օրենքը թույլ է տալիս ունենալ շատ ավելին, Ռուստամ Ակլունցը, ով Վ. Ադունցի Գետափնյա թաղամասում տեղակայված շտաբի պետն է, պատասխանեց, որ իրենց թիմակիցներին բավականացնում է վստահված անձերի քանակը:
Քաղաքապետի մյուս թեկնածուն` անկուսակցական Հրայր Յոլյանը, ով ինքնաառաջադրվել է, gorispress-ի հետ ունեցած զրույցում նշեց, որ ինքը կունենա օրենքով նախատեսված թվով վստահված անձ, ոչ պակաս, քան 27-ը` յուրաքանչյուր ընտրատեղամասում 3 հոգի:
Սույն օրենքն ունի որոշակի սահմանփակումներ՝ վստահված անձ հավակնողների համար. սահմանադրական դատարանի անդամները, դատավորները, դատախազները, ոստիկանությունում և ազգային անվտանգությունում, դատական ակտերի հարկադիր կատարման ծառայությունում, քրեակատարողական հիմնարկներում ծառայողները, զինծառայողները, դիտորդները, թեկնածուները, ընտրական հանձնաժողովի անդամները չեն կարող լինել որևէ թեկնածուի վստահված անձ:
