Երեւան: Մեդիամաքս: Շախմատի աշխարհի չեմպիոն Մագնուս Կարլսենն ասել է, որ Հայաստանում «մեծ խանդավառություն եւ սեր կա շախմատի հանդեպ, եւ դա եզակի երեւույթ է»:
Մագնուս Կարլսենն այդ մասին ասել է հունիսի 23-ին Երեւանում կայացած մամուլի ասուլիսում:
Պատասխանելով լրագրողների հարցերին, Մագնուս Կարլսենն ասել է, որ շախմատ խաղալ իրեն սովորեցրել է հայրը:
«Պրոֆեսիոնալ շախմատիստ դառնում ես այն ժամանակ, երբ փորձ ունես, խաղը քեզանով ես անում, անընդհատ մտածում ես պարտիաների մասին», – ժպտալով ասաց նա: Մագնուս Կարլսենը Հայաստան է այցելել Հայաստանի զարգացման նախաձեռնություններ (IDeA) հիմնադրամի եւ Acronis ընկերության հրավերով:
Հունիսի 23-ին Մագնուս Կարլսենը եւ Լեւոն Արոնյանը Տաթեում համաժամանակյա խաղ են անցկացրել Հալիձոր եւ Տաթեւ համայնքների բնակիչների եւ հոգեւորականների հետ:
Խաղի ամենաերիտասարդ մասնակիցը 7-ամյա Ալեքս Սահակյանն էր Հալիձոր գյուղից, իսկ ամենալավ արդյունքը գրանցել է Տաթեւ գյուղի բնակիչ Լուսինե Պողոսյանը՝ նա ոչ-ոքի է խաղացել շախմատի միջազգային վարկանիշի առաջին եւ երկրորդ տեղերը զբաղեցնող Կարլսենի եւ Արոնյանի հետ:
Այսօր Մագնուս Կարլսենին Երեւանում կընդունի Հայաստանի նախագահ, Հայաստանի շախմատի ֆեդերացիայի նախագահ Սերժ Սարգսյանը:
