Մարիամ Մաթևոսյան
ՄԱԿ-ի «Ռիո+20» գործընթացի շրջանակներում ձևավորված «Կայուն քաղաքներ-կանաչ ճարտարապետության զարգացում» ենթահանձնաժողովը` ՀՀ քաղաքաշինության նախարարության նախաձեռնությամբ, իրականացնում է «Էկո քաղաք» պիլոտային նախագիծը, որը որպես մեկնարկային ծրագիր` առաջին անգամ իրականացվի Գորիս քաղաքում: Հոկտեմբերի 3-ին Գորիսի քաղաքապետ Վաչագան Ադունցն ընդունեց ենթահանձնաժողովի աշխատանքները ղեկավարող համանախագահներ ՀՀ քաղաքաշինության նախարարի տեղակալ Ռուզան Ալավերդյանին և Հայաստանի ճարտարապետների միավորման նախագահ Մկրտիչ Մինասյանին:
Հանդիպմանը մասնակցում էին նաև Կովկասի տարածաշրջանային բնապահպանական կենտրոնի հայաստանյան գրասենյակի տնօրեն Նունե Հարությունյանը, «Հանուն կայուն մարդկային զարգացման» ՀԿ-ի փորձագետ Մարգարիտա Կորխմազյանը, ճարտարապետներ, հասարակական կազմակերպությունների ներկայացուցիչներ:
Հանդիպման նպատակն էր հանրային քննարկումների արդյունքում պարզել, թե ինչ մարտահրավեր, խնդիրներ ունի Գորիս քաղաքը, որի լուծումները կընդգրկվեն պիլոտային նախագծի մեջ:
Գորիս համայնքի ղեկավար Վ. Ադունցը ողջունեց այս նախաձեռնությունը և հայտնեց պատրաստակամությունը՝ համագործակցելու համար:
Ներկաները խոսեցին քաղաքի հրատապ լուծում պահանջող խնդիրներից, որոնց շարքում էր մաքրման կայանի կառուցումը, ոչ բարեկարգ մայթերը, քաղաքի կոլորիտի մաս կազմող պատշգամբների վթարային վիճակը, թեքահարթակների բացակայությունը, հուշարձանների ոչ պավարար պահպանությունը և այլն:
